Last Updated: April 3, 22:50
Thursday, April 3, 2025
މުނިފޫހިފިލުވުން

ކުރީގެ ކްރިކެޓް ތަރި ގަންގޫލީގެ ސީރީޒެއް

އިންޑިއާގެ ކުރީގެ ކްރިކެޓް ތަރި، ސޯރަވް ގަންގޫލީ ފުލުހެއްގެ ރޯލު ކުޅެފައިވާ ސީރީޒެއް ނެޓްފްލިކްސް އިން ގެނެސްދޭން ތައްޔާރުވެއްޖެ އެވެ.

އަންނަ ބުރާސްފަތި ދުވަހު ޕްރީމިއާކުރަން ހަމަޖެހިފައިވާ މި ސީރީޒްގެ ނަމަކީ "ކާކީ: ދަަ ބެންގާލް ޓައިގާ" އެވެ. މި ކްރައިމް ޑްރާމާ އަކީ މަޝްހޫރު ޑައިރެކްޓަރު ނީރަޖް ޕާންޑޭ ޕްރޮޑިއުސްކޮށް، ދެބާތުމާ މަންޑާލް އާއި ތުޝާލް ކަންޓީ ރޭ ޑައިރެކްޓްކޮށްފައިވާ އެއްޗެކެވެ

މި ސީރީޒްގެ ޕްރީމިއާކޮށް ދިމާކޮށް، ގަންގޫލީ ހިމަނައިގެން މަޖާ ގޮތަކަށް ވަނީ ޕްރޮމޯޝަނަލް ވީޑިއޯއެއް ވެސް އާންމުކޮށްފަ އެވެ. "ކާކީ" ވާނީ އިންޑިއާގެ ގައުމީ ކްރިކެޓް ޓީމްގެ ކެޕްޓަންކަން ވެސް ކޮށްފައިވާ މިހާރު އުމުރުން 53 އަހަރުގެ ގަންގޫލީގެ އެކްޓިން ރަސްމީކޮށް ފެންނަ ފުރަތަމަ އުފެއްދުމަށެވެ.

އޭނަ މީގެ ކުރިން އެކިއެކި އުފެއްދުންތަކުގެ ޓީވީ އިޝްތިހާރުތަކުން ފެނިފައިވެ އެވެ.

ގަންގޫލީ އެކްޓަރެއްގެ ގޮތުގައި ފޭނުންނާ ބައްދަލުކުރާ އިރު، އޭނަގެ ބައޮގްރަފިކަލް ޑްރާމާއެއް ވެސް ހަދަން ބޮލީވުޑުން އަންނަނީ ތައްޔާރުވަމުންނެވެ. މިއީ "ސޯނޫ ކޭ ޓިޓީ ކީ ސްވީޓީ" އާއި "ތޫ ޖީޓީ މޭ މައްކާރް" ފަދަ ކާމިޔާބު ފިލްމުތައް ގެނެސްދިން ލަވް ރަންޖަނާއި ޓީ ސީރީޒް ގުޅިގެން ޕްރޮޑިއުސް ކުރަން ހަމަޖެހިފައިވާ އެއްޗެކެވެ.

ގަންގޫލީގެ "ކާކީ" ގެ ކާސްޓްގައި މަޝްހޫރު ތަރިން ކަމަށްވާ ޖީތު މަންދާނީ، ޕްރޮސެންޖީތު ޗެޓަޖީ، ޕަރަމްބްރަތާ ޗެޓަޖީ، ސަސްބަތާ ޗެޓަޖީ، ރިތުވިކް ބޯމިކް، މިމޯ ޗަކްރަބަތީ އަދި ޗިތުރަންގަދާ ސިންގް ހިމެނެ އެވެ.