Last Updated: April 4, 22:44
Friday, April 4, 2025
ޚަބަރު

ޝަހީދުގެ ނަން ދިރާސާ ކުރަން ކޮމިޓީ އަށް

ސުޕްރީމް ކޯޓްގެ ފަނޑިޔާރުކަމަށް އައްޔަން ކުރަން ފޮނުވި ހައި ކޯޓުގެ އިސް ފަނޑިޔާރު ޙުސައިން ޝަހީދުގެ ނަން ދިރާސާކުރުމަށް ރައްޔިތުންގެ މަޖިލީހުގެ ޖުޑީޝަރީ ކޮމިޓީ އަށް މިއަދު ފޮނުވައިފި އެވެ.

ސުޕްރީމް ކޯޓުގެ ފަނޑިޔާރުކަމަށް އޭނަ އައްޔަން ކުރުމަށް ރައީސް ޑރ. މުހައްމަދު ނަން ފޮނުއްވީ ޝަހީދު އައްޔަން ކުރުމަށް ޖުޑީޝަލް ސަރވިސް ކޮމިޝަން (ޖޭއެސްސީ) އިން އެގޮތަށް ލަފާ އަރުވާފައިވާތީ ކަމަށް މަޖިލީހަށް ރައީސް ފޮނުއްވެވި ސިޓީގައި ވިދާޅުވެފައިވެ އެވެ.

ސުޕްރީމް ކޯޓްގެ ފަނޑިޔާރެއްގެ މަގާމު ހުސްވީ ބަލަމުން އަންނަ މައްސަލަަތަކަކާ ގުޅިގެން ތިން ފަނޑިޔާރަކު ސަސްޕެންޑްކޮށްފައި ވަނިކޮށް އޭގެ ތެރެއިން ހުސްނުއްސުއޫދު އިސްތިއުފާ ދެއްވުމާ ގުޅިގެންނެވެ. ސަސްޕެންޑްކުރި އަނެއް ދެ ފަނޑިޔާރުންނަކީ މަހާޒް އަލީ އަޒްމިރަލްދާ ޒާހިރެވެ.

ސުޕްރީމް ކޯޓްގެ ފަނޑިޔާރު ކަމަށް ހުޅުވައިލުމުން ޖުމްލަ ތިން ބޭފުޅަކު ކުރިމަތިލެއްވި އެވެ. އެއީ ޝަހީދުގެ އިތުރުން މަރިޔަމް ނިޔާހަތާއި ރުސްދުﷲ އިބްރާހީމެވެ.

ޝަހީދަކީ މިޞްރުގެ އަލްއަޒުހަރު ޔުނިވަރސިޓީ އާއި ކުއްލިޔަތުލް ދިރާސާތިލް އިސްލާމިއްޔާއިން ޝަރީޢަތާއި ޤާނޫނުގެ ރޮނގުން މަތީ ތަޢުލީމު ޙާޞިލު ކުރެއްވުމަށް ފަހު ރާއްޖޭގެ އިސްލާމީ ޔުނިވަސިޓީން މާސްޓަ އޮފް އިސްލާމިކް ޖުޑީޝަލް ސައިންސް އެންޑް ޝަރީއާ ޕޮލިސީ ހާސިލް ކުރައްވާފައިވާ ބޭފުޅެކެވެ.

އޭނަ ކުރިން އައްޑޫ ފޭދޫ މެޖިސްޓްރޭޓް ކޯޓުގެ މެޖިސްޓްރޭޓްކަމާއި، ނ. ހޮޅުދޫ މެޖިސްޓްރޭޓް ކޯޓުގެ ކޯޓު އިސް މެޖިސްޓްރޭޓްގެ މަގާމުގެ އިތުރުން ކްރިމިނަލް ކޯޓުގެ ޤާޒީގެ މަގާމު ވެސް އަދާކުރެއްވި އެވެ.

ހައި ކޯޓުގެ ފަނޑިޔާރަކަށް ޝަހީދު އައްޔަންކުރީ ނޮވެންބަރު 18، 2022 ގަ އެވެ. އަދި ހައިކޯޓުގެ އިސްފަނޑިޔާރަކަށް އޭނަ އައްޔަންކުރީ އޮކްޓޯރު 30، 2023 ގަ އެވެ.