ފިތުރު އީދުގައި ރިލީޒްކުރަން ތައްޔާރުވަމުން އަންނަ ސަލްމާން ޚާންގެ ފިލްމު "ސިކަންދަރު" އިން އާ ލަވައެއް މިއަދު އާންމުކޮށްފި އެވެ.
ފިލްމުން އާންމުކުރި ތިން ވަނަ ލަވަ އަކީ ސަލްމާނާއި ބަތަލާ ރަޝްމިކާ މަންދަނާއާ އެކީ ގިނަ އަދަދެއްގެ ޑާންސަރުންތަކެއް ފެނިގެންދާ "ސިކަންދަރު ނާޗޭ" އެވެ. ވަރަށް ގްރޭންޑްކޮށް ޝޫޓްކޮށްފައިވާ މި ލަވައިގެ ނެށުން ތައްޔާރުކޮށް ލަވަ ޑައިރެކްޓްކޮށްފައި ވަނީ މަޝްހޫރު ކޮރިއޮގްރާފަރު އަހުމަދު ޚާނެވެ. ފޯރި ގަދަކޮށް ގެނެސްދީފައިވާ "ސިކަންދަރު ނާޗޭ" ހަދާފައި ވަނީ ޖޭމްބް އެވެ. ލަވަ ކިޔާފައި ވަނީ އަމިތު މިޝްރާ އާއި އަކާސާގެ އިތުރުން ސިދާންތު މިޝްރާ އެވެ.
އެކްޝަން ތުރިލާއެއްގެ ގޮތުގައި ގެނެސްދޭ "ސިކަންދަރު" އަކީ ސާޖިދު ނަދިއަދުވާލާ ޕްރޮޑިއުސްކޮށް، ތަމަޅަ ޑައިރެކްޓަރު އޭއާރް މުރްގަދޯސް ގެނެސްދޭ ފިލްމެކެވެ. ސަލްމާން ޑަބަލް ރޯލެއް ކުޅެފައިވާ ފިލްމުގެ ކާސްޓްގައި ޝަރުމަން ޖޯޝީ، ކާޖަލް އަގަރްވާލް، ޕްރަތީކް ބައްބަރް އަދި ސަތިއާރާޖް ހިމެނެ އެވެ.
ގިނަ ބަޔަކު މިހާރު އަންނަނީ "ސިކަންދަރު" ގެ ޓްރެއިލާ އަށް އިންތިޒާރު ކުރަމުންނެވެ. މި ފިލްމުން ކުރި ދައްކަލައި ދެ ލަވަ އަކީ "ޒޮހަރީ ޖަބީން" އާއި "ބަމް ބަމް ބޯލޭ" އެވެ.