ސަރުކާރު ހިންގާ ޕާޓީ، ޕީއެންސީގެ ސުޕަ މެޖޯރިޓީ ރައްޔިތުންގެ މަޖިލީހުގައި އޮތަސް، ރައީސް ޑރ. މުހައްމަދު މުއިއްޒުގެ އެއްވެސް ނުފޫޒެެއް ކޮންޓްރޯލެއް ވެސް މަޖިލީހަށް ނެތް ކަމަށް މަޖިލީހުގެ ރައީސް އަބްދުއްރަހީމް އަބްދުﷲ ވިދާޅުވެއްޖެ އެވެ.
އޭނަ ވިދާޅުވީ އެ މަނިކުފާނުގެ ނުފޫޒަށް މަޖިލީހުގެ ރައީސަށް ވެސް ނެތް ކަމަށެވެ.
އަބްދުއްރަހީމް އެގޮތަށް ވިދާޅުވީ ކެންދޫ ދާއިރާގެ އެމްޑީޕީ މެންބަރު މައުރޫފް ޒާކިރު ރައީސް މުއިއްޒުގެ ނުފޫޒު މަޖިލީހަށް އޮތް ކަމަށް ވިދާޅުވުމާ ގުޅިގެންނެވެ. މަޖިލީހުގެ ގަވާއިދަށް ގެނައި އިސްލާހަކަށް ގުޅޭ ގޮތުން ބަހުސް ކުރައްވަމުން ރަމައުރޫފް ޒާކިރު ވިދާޅުވީ މުޢިއްޒު ރައްޔިތުންގެ މަޖިލިސް ކޮންޓްރޯލް ކުރައްވަމުންދާ ކަމަށެވެ.
އެކަމަށް ރައްދު ދެއްވައި ޢަބްދުއްރަޙީމް ވިދާޅުވީ މަޖިލީހުގެ މެންބަރުންނަށް އިހާނެތިކޮށް ވާހަކަ ދެއްކުމަކީ އެއްވެސް މެންބަރަކު ކޮށްގެންވާނެކަމެއް ނޫން ކަމަށެވެ.
"މަނިކުފާނަށް ހަމަ ރަނގަޅަށް އެނގިވަޑައިގަންނަވާނެ ތިން ބާރު ވަކިވެފައިވާ ނިޒާމެއް މިއޮތީ. މި ނިޒާމުގައި އެއްބާރުން އަނެއްބާރަށް ނުފޫޒު ފޯރުވުމަކާ ނުލައި، އެއްބާރު އަނެއްބާރަށް ފާރަވެރިވެގެން މަސައްކަތް ކުރާގޮތަށް އިންތިޒާމްކުރެވިފައިވާ ނިޒާމެއް ރާއްޖޭގައި މިއޮތީ،" އޭނަ ވިދާޅުވި އެވެ. "އެހެންވީމަ ރައީސުލްޖުމްހޫރިއްޔާ ނިސްބަތްވެވަޑައިގަންނަވާ ޕާޓީގެ ސުޕަ މެޖޯރިޓީ މިތާ އޮތުމަކީ އެއީ އަދި ރައީސުލްޖުމްހޫރިއްޔާގެ ހައިސިއްޔަތުން އެމަނިކުފާނު މިތަން ކޮންޓްރޯލްކުރުން ކަމަށް ވިދާޅުވެވޭނެ ސަބަބެއް ކަމަށް އަޅުގަނޑު ގަބޫލެއް ނުކުރަން."