ކުއްޖެއްގެ ކަރާމާތް ނަގާލި ކަމަށް ބުނެ ރައީސް މުހައްމަދު މުއިއްޒުގެ އަނބިކަނބަލުން ސާޖިދާ މުހައްމަދާއި ގާނޫނީ ވަކީލު އާޒިމާގެ މައްސަލަ ކަމާބެހޭ ފަރާތްތަކަށް ހުށަހެޅުމަށް އެމްޑީޕީން ނިންމައިފި އެވެ.
އެމްޑީޕީގެ ގާނޫނީ ވަކީލުންގެ ޓީމުގެ ފަރާތުން މިއަދު ބޭއްވި ނޫސްވެރިންގެ ބައްދަލުވުމުގައި އަހުމަދު މައުރޫފް ވިދާޅުވީ ކުޑަކުއްޖެއްގެ ކަރާމާތް ނަގާލާފައިވަނީ މުޒާހަރާއެއްގައި މީހަކު ދެއްކި ވާހަކައަކާ ގުޅިގެން ކަމަށް ބުނެ ކަމަށާއި ނަމަވެސް އެ މުޒާހަރާގައި ވާހަކަ ދެއްކި މީހާ ކުޑަކުއްޖެއްގެ މައުލޫމާތު ހާމަވާ ގޮތަށް ވާހަކަދައްކާފައި ނުވާ ކަމަށެވެ.
އެ ކުއްޖާގެ މައުލޫމާތު އާންމުވީ ކުއްޖާގެ މަންމަގެ ފަރާތުން ކަމަށް ބުނެ ގާނޫނީ ވަކީލު އާޒިމާ ހާމަކުރެއްވި މައުލޫމާތުތަކުން ކަމަށާއި އެ މައުލޫމާތުތަކުގައި އެ ކުއްޖާގެ ނަމާއި އުމުރު ހާމަކޮށްފައިވާ ކަމަށް މައުރޫފް ވިދާޅުވި އެވެ.
"އެ ކުއްޖާގެ މަންމަ އާއި އެ ކުއްޖާގެ މަންމަގެ ފަރާތުން ކަމަށް ބުނެ ވާހަކަދެއްކި ގާނޫނީ ވަކީލުގެ މައްސަލަ އަޅުގަނޑުމެން ކަމާބެހޭ އިދާރާތަކަށް ހުށަހެޅުމަށް މިހާރު ވާނީ ނިންމާފައި،" މައުރޫފް ވިދާޅުވި އެވެ.
އެގޮތުން އެ މައްސަލަ ފުލުހުންގެ އިދާރާގެ ދަށުން މަސަތްކަތް ކުރަމުންދާ އެފްސީޕީޑީ އަށާއި ޖެންޑާ މިނިސްޓްރީގެ ދަށުން އެ ބާވަތުގެ މައްސަލަތައް ބަލަން އޮންނަ ފެމިލީ އެންޑް ޗިލްޑްރަންސް ޑިޕާޓުމަންޓަށް ހުށަހެޅުމަށް ނިންމާފައިވާ ކަމަށް މައުރޫފް ވިދާޅުވި އެވެ.
މީގެއިތުރުން މައުރޫފް ވަނީ މިއީ ގައުމުގައި މިވަގުތު ހުރި ބޮޑެތި މައްސަލަތަކުގެ ސަމާލުކަން އަނބުރާލުމަށް މުޒާހަރާއެއްގައި މީހަކު ދެއްކި ވާހަކައަކާ ގުޅުވައި ލިބުނު ފުރުސަތެއްގައި "ވިކްޓިމް ކާޑު ކުޅުމަށް" ކުރި ކަމެއް ކަމަށްވެސް ވިދާޅުވެފަ އެވެ.
ރާއްޖޭގައި ވޭޕް މަނާކޮށްފައި ވަނީ، ރައީސް ޑރ. މުހައްމަދު މުއިއްޒުގެ ދަރިކަލުން އުމައިރު އެތަކެތި ބޭނުންކުރާތީ ކަމަށް ބުނެ އެމްޑީޕީ މުޒާހަރާއެއްގެ ތެރެއިން އެމްޑީޕީގެ އެކްޓިވިސްޓު މަރިޔަމް ޒުބައިރު (މަންދީ) ތުހުމަތުކުރި މައްސަލަ ވަނީ ހޫނުވެފަ އެވެ.
މި ވާހަކަތަކާއި ގުޅިގެން ރައީސްގެ އާއިލާގެ ފަރާތުން ވަނީ މަންދީ އާއި އެމްޑީޕީގެ ޗެއާޕާސަން ފައްޔާޒް އިސްމާއީލާއި އެ ޕާޓީގެ މައްޗަށް ދައުވާކުރަން ނިންމާފަ އެވެ.