އައްޑޫ ސިޓީ، ހިތަދޫގައި ހުންނަ ޕޮލިސް ކަސްޓޯޑިއަލް ޑިޕާޓްމެންޓް ކުރިމަތިން ލިންކް ރޯޑުގައި މިއަދު ހިނގި ނުރައްކާތެރި އެކްސިޑެންޓެއްގައި ޒުވާނަކަށް އަނިޔާވެއްްޖެ އެވެ.
މިއަދު ހެނދުނު 9:30 ޖަހާ އެހާކަށްހާ އިރު ސައިކަލަކާއި ކާރެއް ޖެހިގެން ހިނގި ހާދިސާގައި ސައިކަލް ދުއްވަން އިން ޒުވާނާގެ ހަށިގަނޑުގެ ބައެއް ތަންތަނުން މަށައިގެން ވެސް ގޮސްފައިވާއިރު އޭނާގެ އަތަށް ވެސް ވަނީ އަނިޔާވެފައެވެ.
މި އެކްސިޑެންޓް ހިނގި އިރު ސައިކަލް ދުއްވި ޒުވާނާ އިނީ ހެލްމެޓް އަަޅައިގެންނެވެ. އޭނާއަށް ލިބުނު ޒަޚަމްތަކަށް ހިތަދޫ ރީޖަނަލް ހޮސްޕިޓަލުގައި ފަރުވާދިނުމަށްފަހު މިހާރު ވަނީ ދޫކޮށްލާފައެވެ.
މައުލޫމާތު ލިބިފައިވާ ގޮތުގައި މި އެކްސިޑެންޓް ހިނގީ ލިންކު ރޯޑުން ގަމާއި ވީ ކޮޅަށް ދުއްވާފައި ދިޔަ ކާރެއް ސިޓީ ކައުންސިލަށް ދާން އޮންނަ މަގަށް އަޅަން އުޅެނިކޮށް، ލިންކް ރޯޑުން ހިތަދޫ އާއި ވީކޮޅަށް ދުއްވާފައި އައި ސައިކަލެއްގައި ޖެހިގެންނެވެ.
މި އެކްސިޑެންޓްގައި ކާރުގެ ކުރީކޮޅަށް ވަރަށް ބޮޑަށް ގެއްލުން ވެފައިވާއިރު ސައިކަލަށް ވެސް އެކިވަރުގެ ގެއްލުންތައް ވަނީ ވެފައެވެ.