ރަމަޟާން މަހުގެ ދުވާލުގެ ވަޤުތުގައި އަނބިމީހާ ގައިގައި އަތްލާ ބޮސްދީ ހެދުމުގެ ސަބަބުން މަނި ބޭރުވެއްޖެ ނަމަ ރޯދަ ގެއްލޭނެ ހެއްޔެވެ؟
ރަމަޟާންމަހުގެ ރޯދަ ހިފާއިރު ނުވަތަ އެނޫނަސް ވާޖިބު ރޯދައެއް ހިފާއިރު (މިސާލަކަށް ކައްފާރާގެ ގޮތުގައި ހިފާ ރޯދަހިފާ އިރު) ޖިމާޢުވުމަކީ ހުއްދަކަމެއް ނޫނެވެ. އަދި އެކަމުގެ ސަބަބުން ރޯދަ ބާޠިލުވާނެ އެވެ.
(ރޯދައަށް ހުންނަ އިރު) އަނބިމީހާ ގައިގަ އަތްލުމާއި ބޮސްދިނުން ފަދަ ކަންތައްތައް ކުރުމާމެދު ދަންނަ އެވެ. އެއީ މައްސަލައެއް ނޫނެވެ. ފަހެ ހަމަކަށަވަރުން ނަބިއްޔާ ﷺ ރޯދައަށް ހުންނަވާއިރު އެފަދަ ކަންތައްތައް ކުރެއްވި އެވެ. އެހެނަސް މީހެއްގެ ކިބައިގައި ހުންނަ ބަލިކަށި ކަމެއްގެ ސަބަބުން މަނިބޭރުވުންފަދަ ކަމެއް ހިނގާފާނެކަމުގެ ބިރު އޮތްނަމަ އެފަދަ މީހަކަށް އޮތީ އެކަމުން ދުރުހެލިވުމެވެ. އަދި އެކަމުގައި ފަރުވާ ކުޑަކޮށްގެން ނުވާނެއެވެ.
އެފަދަ ކަމެއްކުރުމުގެ ސަބަބުން ދުވާލުގެ ވަޤުތުގައި މަނި ބޭރުވެއްޖެ ނަމަ ހިނައިގަތުން އޭނާގެ މައްޗަށް ވާޖިބުވާނެ އެވެ. އަދި އެދުވަހުގެ ރޯދަ ޤަޟާކުރަން ޖެހޭނެ އެވެ. އެހެނަސް އޭނާ ކައްފާރާއެއް ދޭކަށް ނުޖެހޭނެ އެވެ. ކައްފާރާ ދޭން ޖެހޭނީ އަނބިމީހާއާ ޖިމާޢު ވުމުންނެވެ.[1] އަނބިމީހާގެ ގައިގައި އަތްލުމާއި ބޮސްދިނުން ފަދަ ކަންކަމަކީ ރޯދައަށް ހުއްޓަސް ހުއްދަ ކަންކަމެވެ.
ސަމާޙަތުއްޝައިޚް ޢަބްދުލް ޢަޒީޒު ބުން ބާޒު رحمه الله
ސުޢޫދީ ޢަރަބިއްޔާގެ ކުރީގެ މުފްތީ
فتاوى نور على الدرب (16/238)
__________________________________
[1] ރަމަޟާން މަހުގެ ދުވާލު ވަޤުތު ޖިމާޢުވާ މީހެއްގެ ކައްފާރާއަކީ އަޅަކު މިނިވަން ކުރުމެވެ. އެކަން ކުރުމުގެ ކުޅަދާނަކަށް ލިބިގެންނުވާ މީހާ ދެމަސްދުވަހު ވިދިވިދިގެން ރޯދަ ހިފުމެވެ. އެކަން ކުރުމުގެ ކުޅަދާނަކަށް ލިބިގެންނުވާ މީހާ 60 މިސްކީނުންނަށް ކާން ދިނުމެވެ.
މަސްދަރު: ދިސަލަފިއްޔާ