ސުޕްރީމް ކޯޓުގެ ފަނޑިޔާރަކު ނޫސްބަޔާނެއް ނެރުމަކީ ސުލޫކީ މައްސަލައެއް ނޫން ކަމަށް ކުރީގެ އުއްތަމަ ފަނޑިޔާރު ޑރ. އަހުމަދު އަބްދުﷲ ދީދީ(ޑރ.ޑީޑީ) ވިދާޅުވެއްޖެ އެވެ.
ސުޕްރީމް ކޯޓުގެ ފަނޑިޔާރު ޑރ. އަޒްމިރާލްދާ ޒާހިރުގެ ފަރާތްޕުޅުން ނޫސް ބަޔާން ނެރުއްވާތީ ސުލޫކީ މައްސަލައެއް ބެލުމަށް ޖުޑީޝަލް ސާވިސް ކޮމިޝަން (ޖޭއެސްސީ) އިން އިއްޔެ ވަނީ ނިންމާފަ އެވެ. މި މައްސަލަ ބެލުމަށް ނިންމީ ފަނޑިޔާރުންގެ ސުލޫކީ މިންގަނޑަކާ ހިލާފުވެފައިވާ ކަމަށް ބުނެ އެވެ.
އެކަމާ ގުޅިގެން އެކްސްގައި ކުރެއްވި ޕޯސްޓެއްގައި ޑރ. ޑީޑީ ވިދާޅުވީ އަދުލު އިންސާފު ޤާއިމުކުރުމުގެ ބާރުގެ އެންމެ އިސްފަރާތުގައި ހިމެނޭ ފަނޑިޔާރަކު ނޫސްބަޔާނެއް ނެރުމަކީ އޭގެ ޒާތުގައި ސުލޫކީ މައްސަލައެއް ނޫން ކަމަށެވެ. ސުލޫކީ މައްސަލައަކަށް ވާނީ ކޯޓުގައި ހިނގަމުންދާ މައްސަލައަކާ ގުޅިގެން ނުވަތަ ސިޔާސީ ޚިލާފުތަކާ ގުޅިގެން ކޮމެންޓްކޮށް ނެރޭ ބަޔާންތައް ކަމަށާއި ސަބަބަކީ ފަނޑިޔާރަކީ ވަކިފަރާތަކަށް ބުރަނުވެ ތަޢައްޞުބުން އެއްކިބާވެ ތިބެންޖެހޭ ބަޔަކަށް ވާތީ ކަމަށް ޑީޑީ ވިދާޅުވި އެވެ.
އެހެންނަމަވެސް، ސުޕްރީމް ކޯޓުގެ ފަނޑިޔާރަކު ޢަދްލު އިންޞާފް ޤާއިމުކުރުމުގެ ނިޒާމާ ގުޅުންހުރި އިދާރީ ކަންތަކާއި، އަދި އެ ނިޒާމުގެ މުސްތަޤިއްލު ކަމަށް ދިމާވެފައިވާ ގޮންޖެހުންތަކާ ގުޅިގެން ނުވަތަ ޤާނޫނުއަސާސީގެ 141 ވަނަ މާއްދާގެ (ނ) އާއި (ރ) އާ ޚިލާފަށް، މަންހަޖީ ނުވަތަ ސިސްޓެމެޓިކް ގޮތެއްގައި ހިންގޭ ކަންތައްތަކާ ގުޅިގެން ކޮމެންޓް ކުރުމަކީ ސުލޫކީ މައްސަލައެއް ކަމުގައި ނުބެލެވޭނެ ކަމަށްވެސް ޑީޑީ ވިދާޅުވި އެވެ.
އަޒްމިރާލްދާގެ ވަކީލު ގެންދަވަނީ ޖޭއެސްސީގައި ތަހުގީގު ހިނގަމުންދާ މައްސަލަތަކާ ގުޅޭގޮތުން ބަޔާންތައް ނެރުއްވަމުންނެވެ. އަޒްމިރަލްދާގެ ފަރާތްޕުޅުން ބަޔާންތައް ނެރުއްވަމުން ގެންދަވަނީ އޭނާގެ ވަކީލް އިބްރާހިމް ޝަމީލް އެވެ.
ޖޭއެސްސީން އަންނަނީ އަޒްމިރަލްދާގެ އިތުރުން ސުޕްރީމް ކޯޓުގެ ފަނޑިޔާރު މަހާޒު އަލީ ޒާހިރާއި ގުޅޭ ދެ މައްސަލައެއް ބަލަމުންނެވެ.
އޭގެތެރެއިން އެ މައްސަލައަކީ ހައި ކޯޓުގެ އެސިސްޓެންޓް ރަޖިސްޓްރާ ހުސައިން މުހައްމަދު ހަނީފް ސުޕްރީމް ކޯޓަށް ހާޒިރުކޮށް، ސުޕްރީމް ކޯޓުގެ އޭރުގެ ފަނޑިޔާރު ހުސްނުއްސުއޫދު "ހުތުރު ބަހުން" ވާހަކަ ދެއްކެވި ކަމަށް ބުނާ މަޖިލީހުގައި އަޒްމިރަލްދާ އާއި މަހާޒު އިންނެވި ކަމަށް ބުނާ މައްސަލައެކެވެ.
އަނެއް މައްސަލައަކީ މަސާޖު ޕާލާއަކުން ހައްޔަރުކުރި އަޒްމިރާލްދާގެ ފިރިކަލުން ޑރ. އިސްމާއިލް ލަތީފުގެ ބަންދާމެދު ގޮތެއް ނިންމަން ހާޒިރުކުރުމުން ފަނޑިޔާރުންތަކަކަށް ނުފޫޒު ފޯރުވިކަމަށް ބުނާ މައްސަލައެކެވެ. މި މައްސަލައިގައި ދެ ފަނޑިޔާރުން ހާޒިރުކޮށް ޖޭއެސްސީން ވަނީ ބަޔާން ވެސް ނަގައިފަ އެވެ.
ޕާޓީ ބަދަލުކުރުމުން މަޖިލީހުގެ މެމްބަރުކަން ގެއްލޭ ގޮތަށް ގާނޫނުއަސާސީއަށް ސަރުކާރުން ގެނެސްފައިވާ އިސްލާހު ބާތިލުކުރަން ސުޕްރީމް ކޯޓަށް ހުށަހަޅާފައިވާ މައްސަލައާ ގުޅިގެން އެ ކޯޓުގެ ފަނޑިޔާރުންގެ ބަންޗަށް ސަރުކާރުން ނުފޫޒު ފޯރުވާ ކަމަށް ތުހުމަތުކުރައްވައި އެ ބެންޗުގައި ހިމެނިވަޑައިގެންނެވި ފަނޑިޔާރު ހުސްނުއްސުއޫދު ދާދިފަހުން ވަނީ އިސްތިއުފާ ދެއްވާފަ އެވެ.