ޗައިނާގެ ބެއިޖިންގައި ކުރިއަށްދާ ސެމިނާއެއްގައި ބައިވެރިވުމަށް މޯލްޑިވްސް މީޑިއާ ކައުންސިލް (އެމްއެމްސީ) ގެ ޓީމެއް އެ ގައުމަށް ފުރައިފި އެވެ.
މި ދަތުރަކީ "ސެމިނާ އޮން ހެޑްސް އޮފް ޖާނަލިސްޓް އޯގަނައިޒޭޝަންސް ފޯ ބެލްޓް އެންޑް ރޯޑް އިނީޝިއޭޓިވް (ބީއާރްއައި) ޕާޓްނާ ކަންޓްރީސް" ގެ ނަމުގައި ޗައިނާ ސަރުކާރުން އިންތިޒާމްކޮށްގެން ކުރިއަށް ގެންދާ ސެމިނާއެކެވެ.
އެ ފުރުސަތު އެމްއެމްސީ އަށް ފަހިކޮށްދީފައި ވަނީ ފޮރިން މިނިސްޓްރީން ކަމަށް ކައުންސިލުން ބުންޏެވެ.
ކައުންސިލުން ބުނީ ޕްރޮގްރާމްގެ މައިގަނޑު މަގުސަދަކީ، ޗައިނާގެ ޚަބަރާއި މީޑިއާގެ އާދަތައް ދެނެގަނެ މީޑިއާގެ ދާއިރާއިން ޗައިނާއާއި ބީއާރްއައިގެ އެހެނިހެން ޤައުމުތަކުގެ މެދުގައި ގުޅުން ބަދަހިކުރުން ކަމަށެވެ.
ސެމިނާގައ،ި ކައުންސިލުގެ ފަރާތުން ބައިވެރިވެފައި ވަނީ ކައުންސިލުގެ މެންބަރު އަލީ އާދަމާއި ކައުންސިލްގެ އެޑްމިނިސްޓްރޭޓިވް އޮފިސަރު އައިޝަތު މަލްސާ މާހިރާއި 'އޭއޯ ނިއުސް' ގެ ޝިމްލާ އަހުމަދުގެ އިތުރުން 'މިހާރު' ގެ އިފްރާޒް ޢަލީ އެވެ.