ކުޑަކުދިން ކުށގެ ވެއްޓޭ ހުށަހެޅޭ މަގުތައް ބަންދުކޮށް އެކަމަށް ހަރުދަނާ ހައްލެއް ގެނައުމަކީ ސަރުކާރުގެ ވަރަށް ބޮޑު އަމާޒެއް ކަމަށް ހޯމްލޭންޑް މިނިސްޓަރު އަލީ އިހްސާން ވިދާޅުވެއްޖެ އެވެ.
ޑިޕާޓްމަންޓް އޮފް ޖުވެނައިލް ޖަސްޓިސް (ޑީޖޭޖޭ) ގެ ވެބްސައިޓް ލޯންޗް ކުރުމަށް ބޭއްވި ރަސްމިއްޔާތުގައި އޭނަ ވިދާޅުވީ މިނިސްޓްރީން ކުރަމުން އަންނަ މަސައްކަތަކީ ރާއްޖޭގެ މުޅި އިޖުތިމާއީ ގިއުގަނޑު ބަދަލުކޮށްލުމަށް ކުރަމުން އަންނަ މަސައްކަތެއްކަ މަށެވެ. އެގޮތުން ކުޑަކުދިން ކުށުގެ ވެއްޓަށް ހުށައެޅުމަށް ހުރި ކަންކަން ނައްތާލުމަކީ މި ސަރުކާރުން ހާސިލު ކުރަން ބޭނުންވާ ވަރަށް މުހިންމު އަމާޒެއް ކަމަށް ވިދާޅުވި އެވެ.
"އަޅުގަނޑުމެން މިކުރާ މަސައްކަތަކީ ރާއްޖޭގެ މުޅި އިޖްތިމާއީ ގިއުގަނޑު އެއްކޮށް ބަދަލުކޮށްލުމަށްޓަކައި މީގެ އާހިރު ނަތީޖާ ހޯދުމަށްޓަކައި ކުރާ މަސައްކަތެއް. މި މަސައްކަތް ކާމިޔާބު މަސައްކަތެއްކަމަށް ވާ ހިސާބަކީ އަޅުގަނޑުމެންގެ ތުއްތު ކުދިންގެ ތެރެއިން ކުށައް އަރައިގަންނަ ނުވަތަ ކުށުގެ މާހައުލަށް ވަދެދާނެކަމުގެ ރިސްކު އޮތް ކުދިންނަށް ދާއިމީ ހައްލެއް ހޯދައިދެވޭނެ ދުވަސް،' އިހްސާން ވިދާޅުވި އެވެ. "އެ ދުވަހަކީ އަޅުގަނޑުމެން ބޭނުން އަދުގެ ސަރުކާރުގެ މި ޒައާމަތުގެ ތެރޭގައި އަޅުގަނޑުމެންނަށް ފެންނާނެ ދުވަހެއްކަމަށްވުން. އެކަމުގެ އެންމެ ބޮޑު ޒިންމާއެއް އަދާކުރާނީ މި ޑިޕާޓްމަންޓުން."
ލޯންޗްކުރި ޑީޖޭޖޭގެ ވެބްސައިޓް މެދުވެރިކޮށް ޖުވެނައިލް ޖަސްޓިސް އިން ކުރަމުން އަންނަ މަސައްކަތްތަކުގެ މައުލޫމާތު ފަސޭހަކަމާއެކު ހޯދޭނެ އެވެ. އެގޮތުން އާންމު މައުލޫމާތުތަކާއި، އަދުލުގެ ޤާނޫނުގެ ދަށުން ޑިޕާޓްމަންޓުން ކުރާ މަސައްކަތްތަކާއި، ޖުވެނައިލް ޖަސްޓިސްގެ މެންޑޭޓްތަކާއި، ގާނޫނުތަކާއި ގަވައިދުތަކާއި، މީޑިއާ ރިޕޯޓްތަކާއި، ތަފާސްހިސާބުތައް ފަސޭހަކަމާއެކު ބަލާލެވޭނެ އެވެ.