މަޝްހޫރު ސިޓްކޮމް "ފްރެންޑްސް" އިން ވިދި ބަތަލާ ޖެނިފާ އެނިސްޓަން އެންމެ ފަހުން ކައިވެނިކުރި އެކްޓަރު ޖަސްޓިން ތެހޫ ކައިވެނިކޮށްފި އެެވެ.
އޭނަ އާއި ބައިވެރިޔާ ނިކޯލް ބްރައިޑަން ބްލޫމް ކައިވެނިކުރީ އިއްޔެ މެކްސިކޯގައި ބޭއްވި ކުލަގަދަ ހަފުލާއެެއްގަ އެވެ. އެ ހަފުލާގައި ދެ ފަރާތުގެ އާއިލާގެ މީހުންނާއި ގާތް ބައެއް ރަހުމަތްތެރިން ވެސް ބައިވެރިވި އެވެ.
އެމެރިކާގެ ޝިކާގޯ އަށް އުފަން 30 އަހަރުގެ ނިކޯލް އަކީ ވެސް ބަތަލާއެކެވެ. ދެހާސް ބާވީހުގައި ރައްޓެހިވި ޖަސްޓިން އާއި ނިކޯލް ކައިވެނިކޮށްފައި މި ވަނީ މިދިޔަ އަހަރުގެ ތެރޭގައި އެންގޭޖް ވެސް ވުމަށް ފަހު އެވެ.
ޖަސްޓިން، 53، އާއި ޖެނިފާ އެނިސްޓަން، 56، ކައިވެނި ރޫޅައިލީ 2018 ގަ އެވެ. އެ ދެ މީހުން ކައިވެނިކުރީ 2015 ގަ އެވެ. އޭގެ ކުރިން އެނިސްޓަން މަޝްހޫރު އެކްޓަރު ބްރެޑް ޕިޓާ ވެސް ކައިވެނިކުރި އެވެ. އެ ދެ މީހުން 2000 ވަނަ އަހަރު ކުރި ކައިވެނި ރޫޅައިލީ 2005 ގަ އެވެ.
ކާމިޔާބު ގިނަ ފިލްމުތަކެއް ކުޅެފައިވާ ޖަސްޓިންގެ އެންމެ ފަހުގެ ފިލްމަކީ މިދިޔަ އަހަރުގެ "ބީޓްލްޖޫސް ބީޓްލްޖޫސް" އެވެ.