ރައީސް ޑރ. މުހައްމަދު މުއިއްޒުގެ ވައުދާ އެއްގޮތަށް ވީހާ ވެސް އަވަހަކަށް ޖުޑީޝަލް ސާވިސް ކޮމިޝަން (ޖޭއެސްސީ) އިސްލާހު ކުރަން ޖެހޭ ކަމަށް ރައްޔިތުންގެ މަޖިލީހުގެ ހިތަދޫ މެދު ދާއިރާގެ ޕީއެންސީގެ މެންބަރު އަހުމަދު އަޒާން ވިދާޅުވެއްޖެ އެވެ.
މަޖިލީހުގެ މިއަދުގެ ޖަލްސާގައި އޭނަ ވިދާޅުވީ ޖޭއެސްސީއަށް ސިޔާސީ ބޭފުޅުން އައްޔަން ނުކުރުމަކީ ރައީސްގެ ވައުދެއް ވެސް ކަމަށެވެ.
ސުޕްރީމް ކޯޓުގެ ފަނޑިޔާރުކަމަށް ހައިކޯޓުގެ އިސް ފަނޑިޔާރު ހުސައިން ޝަހީދު އައްޔަންކުރަން މަޖިލީހުގެ ޖުޑިޝަރީ ކޮމިޓީން އިއްޔެ ފާސްކޮށްފައިވާ އިރު، އެ ނަން ފާސްކުރަން މިއަދުގެ ޖަލްސާއަށް އެޖެންޑާކޮށްފައިވެއެވެ.
އެ މައްސަލައަށް ބަހުސްކުރައްވަމުން މެންބަރު އަޒާން ވިދާޅުވީ، ޝަހީދަކީ ސުޕްރީމް ކޯޓުގެ ފަނޑިޔާރުކަމަށް އައްޔަންކުރަން އެންމެ ގާބިލު ބޭފުޅާ ކަމަށް އޭނާ ވެސް ގަބޫލުކުރައްވާ ކަމަށެވެ. ނަމަވެސް ގައުމެއް ތަރައްގީވާން އިންސާނީ ވަސީލަތާއި ގުދުރަތީ ވަސީލަތުގެ އިތުރުން މުއައްސަސާތައް ވަރުގަދަވުމުން ކަމަށް ވިދާޅުވި އެވެ.
"ރަނގަޅު ފަނޑިޔާރުންލުމުގެ އިތުރަށް ނިޒާމު އިސްލާހުކުރަން ޖެހޭ." އަޒާން ވިދާޅުވި އެވެ.
އޭނާ ވިދާޅުވީ، އިދިކޮޅުގައި ޕީޕީއެމް/ޕީއެންސީ އޮތްއިރު އެންމެ ގަދައަށް ދެއްކި ވާހަކައަކީ ވެސް ޖޭއެސްސީ އިސްލާހުކުރުމާއި އެ ކޮމިޝަންގެ ކޮމްޕޮޒިޝަން ބަދަލުކުރުމުގެ ވާހަކަ ކަމަށެވެ.
"ރައީސް ޑރ. މުހައްމަދު މުއިއްޒު ވަނީ ޖޭއެސްސީއަށް ސިޔާސީ ބޭފުޅުން އައްޔަންނުކުރައްވާނެ ކަމަށް ވިދާޅުވެފައި،" އަޒާން ވިދާޅުވި އެވެ. "ވައުދުފުޅެއް އެއީ. އަޅުގަނޑަށް ހަމަ ޔަގީން އަޅުގަނޑުމެންގެ މި އިއްޒަތްތެރި މަޖިލީހުން ވެސް އެ ކަން އެގޮތަށް ކުރައްވާކަށް ބޭނުންފުޅެއް ނުވާނެ."
އަޒާން އޭނަ ވިދާޅުވީ ރައީސްގެ ވައުާ އެއްގޮތަށް ޖޭއެސްސީގެ ކޮމްޕޮޒިޝަން އިސްލާހުކުރަން ވީ އެންމެ އަވަހަކަށް މަޖިލީހަށް ބިލެއް ހުށަހަޅަން އެޓާނީ ޖެނެރަލް އަހުމަދު އުޝާމަށް ގޮވައިލައްވާ ކަމަށެވެ.
"އަޅުގަނޑުމެންގެ އިއްޒަތްތެރި މެންބަރުން މި ތިއްބެވީ އެ ފަދަ ބިލެއް ހުށަހަޅުއްވައިފި ނަމަ ވަގުތުން ފާސްކުރަން ތައްޔާރަށް." އެނާ ވިދާޅުވި އެވެ.