މިދިޔަ ޖެނުއަރީ މަހު ރިލީޒްކުރި ބޮލީވުޑްގެ ފިލްމު "ސްކައި ފޯސް" އަންނަ ހުކުރު ދުވަހު އެމެޒޯން ޕްރައިމް ވީޑިއޯ އިން ޕްރީމިއާ ކުރަން ނިންމައިފި އެވެ.
މިކަން އިއުލާންކޮށްފައި ވަނީ ފިލްމުގައި ހިމެނޭ ލަވައެއްގެ ޓްރެންޑިން ސްޓެޕްތަކެއް، މީގެ ލީޑް ތަރިން ކަމަށްވާ އަކްޝޭ ކުމާރާއި ވީރް ޕަހަރިޔާ ޖައްސާ ތަން ދައްކުވައިދޭ ވީޑިއޯއަކުންނެވެ.
"ސްކައި ފޯސް" ފިލްމަކީ މި އަހަރުގެ މިހާތަނަށް ރިލީޒްކުރި ފިލްމުތަކުގެ ތެރެއިން އެންމެ ކާމިޔާބު ފިލްމެވެ. "ސްކައި ފޯސް" އަކީ އިންޑިއާގެ ބޮކްސް އޮފީހުގައި މިހާރު ރަސްކަން ކުރަމުން އަންނަ ވިކީ ކޯޝަލްގެ "ޗާވާ" ގެނެސްދިން ޕްރޮޑިއުސަރު ދިނޭޝް ވިޖަންގެ މެޑޮކް ފިލްމްސްގެ އެކްޝަން ޑްރާމާއެކެވެ.
ޖެނުއަރީ މަހުގެ 24 ގައި ރިލީޒްކުރި ފިލްމު ބިނާކޮށްފައި އޮތީ އިންޑިއާ އާއި ޕާކިސްތާނާ ދެމެދު 1965 ގައި ހިނގި ވައިގެ ހަނގުރާމައަށެވެ. "ސްކައި ފޯސް" ގައި އަކްޝޭ އާއި އަލަށް ތައާރަފުކުރި ވީރް ކުޅެފައި ވަނީ އަސްކަރީ ޕައިލެޓުންގެ ރޯލެވެ.
އަބީޝެކް އަނިލް ކަޕޫރާއި ސަންދީޕް ކެލްވާނީ ޑައިރެކްޓްކުރި ފިލްމުގެ ބަތަލާއިންނަކީ ސާރާ އަލީ ޚާނާއި ނިމްރަތު ކޯރެވެ.