އަތޮޅުތެރޭގައި ގައިންގަޔަށް ނާރާ ބަލިތަކަށް ފަރުވާކުރާ މީހުންނާއި ދާއިމީ ގޮތެއްގައި ބޭސް ބޭނުންކުރާ މީހުންހެ ރަޖިސްޓްރީއެއް އެކުލަވާލުމަށް ނިންމައިފި އެވެ.
ހެލްތު މިނިސްޓްރީން ބުނީ ގައިން ގަޔަށް ނާރާ ބަލިތައް (އެންސީޑީ) އާއި އެހެނިހެން ގޮތްގޮތުން ދިގު މުއްދަތަކަށް ބޭސް ބޭނުން ކުރާ ފަރާތްތަކުގެ ރަޖިސްޓްރީއެއް އެކުލަވާލުން ނިންމާފައި ވަނީ އެ ފަރާތްތަކަށް ބޭނުންވާ ބޭސް މެދުނުކެނޑި ލިބޭނެ އިންތިޒާމް ހަމަޖެއްސުމަށާއި، ގަވާއިދުން ޓެސްޓްތައް ހެދުމާއެކު ދެމެހެއްޓެނިވި ގޮތެއްގައި ޚިދުމަތް ދެވޭކަން ކަށަވަރު ކުރަން ކަމަށެވެ.
އެގޮތުން އަންނަ މަހުގެ 1 އިން ފެށިގެން ނ އާއި ށ. އަތޮޅުގެ ރަށްތަކުގައި މި ރަޖިސްޓްރީ އެކުލަވާލުމުގެ އަމަލީ މަސައްކަތް ފަށާނެ އެވެ. އަދި އެހެން އަތޮޅުތަކުގައި ވެސް ކުރިއަށް އޮތް ތިން މަސް ދުވަހުގެ ތެރޭގައި މި މަސައްކަތް ފެށުމަށް ނިންމާފައިވެ އެވެ.
ހެލްތު މިނިސްޓްރީން ބުނީ މި ޚިދުމަތް ތަންފީޒު ކުރުމަށްޓަކައި ކޮންމެ ހެލްތު ފެސިލިޓީއަކުން ފޯކަލްޕޮއިންޓެއް ކަނޑައަޅައި ކޯޑިނޭޓް ކުރެވޭނޭ އިންތިޒާމް ހަމަޖައްސާފައިވާ އިރު، ބޭނުންވާ ބޭހުގެ ލިސްޓާއި ބަލީގެ ޓެސްޓްތައް ހަދައި، ކޮންޓިނިއު ކުރެވޭނޭ އިންތިޒާމްތައް ހަމަޖެހިފައިވާ ކަމަށެވެ.