ސުޕްރީމް ކޯޓުގެ ފަނޑިޔާރުންތަކެއް ސަސްޕެންޑުކޮށް، އެ ކޯޓަށް ސަރުކާރުން ނުފޫޒު ފޯރުވުމަށް ކުރަމުންދާ ކަންކަން ގާތުން ބަލަމުންދާ ކަމަށް އދ. ގެ ހާއްސަ ރެޕަޓުއާ, މާގަރެޓް ސެޓާތުވައިޓް ވިދާޅުވުމުން ފޭދޫ އުތުރު ދާއިރާގެ ޕީއެންސީ މެމްބަރު އިސްމާއިލް ނިޒާރު ފާޑު ވިދާޅުވެއްޖެ އެވެ.
މި ކަންކަން ގާތުން ބަލަމުންދާ ކަމަށް އދ. ގެ ހާއްސަ ރެޕަޓުއާ ވިދާޅުވި އިރު، ސުޕްރީމް ކޯޓުގެ ފަނޑިޔާރުކަމުން ސަސްޕެންޑްކޮށްފައިވާ ޑރ. އަޒްމިރަލްދާ ޒާހިރު ވަނީ އެ މައްސަލަ އދ.ގެ ސްޕެޝަލް ރެޕިއުޓާ އޮން އިންޑެޕެންޑެންސް އޮފް ޖަޖެސް އެންޑް ލޯޔާސްއަށް އަށް ހުށަހަޅުއްވާފަ އެވެ. އަދި ސުޕްރީމް ކޯޓުގެ ފަނޑިޔާރުކަމުން ދާދިފަހުން އިސްތިއުފާ ދެއްވި ހުސްނުއްސުއޫދު ވަނީ އދ. ގެ އިންސާނީ ހައްގުތަކާ ބެހޭ ކޮމިޝަނަރުގެ އޮފީހަށް އެ މައްސަލަ ހުށަހަޅުއްވާފަ އެވެ.
އަދި މި މައްސަލަ އެމްބަސީތަކާއި ހައިކޮމިޝަންތަކުގެ ސަމާލުކަމަށް ވެސް ފަނޑިޔާރު އަޒްމިރަލްދާ ވަނީ ގެންނަވާފަ އެވެ.
މިކަމާ ގުޅިގެން ފޭސްބުކްގައި ކުރެއްވި ޕޯސްޓެއްގައި ނިޒާރު ވިދާޅުވީ ސުޕްރީމް ކޯޓުގެ ބެންޗަށް ބަދަލު ގެންނަން ފެންނަ ކަމަށް ނިންމީ ރާއްޖޭގެ ޤާނޫނު ހަދާ މަޖިލީހުގެ ފުރިހަމަ ތާއީދާއެކު ކަމަށާއި އެ މަޖިލިސް އެކުލަވާލީ ރައްޔިތުންގެ ސީދާ ވޯޓަކުން ކަމަށެވެ.
"ދިވެހި ރައްޔިތުން ނިންމާ ނިންމުމަކަށް އ.ދ އަކަށް ވެސް އަދި އެހެންވެސް ބަޔަކަށް ބަސް ނުބުނެވޭނެ. ދިވެހީން ނިންމާ ނިންމުންތަކަށް ބަސް ބުނާނީ ދިވެހި ރައްޔިތުން،" ނިޒާރު ވިދާޅުވި އެވެ.
ޖޭއެސްސީން އަންނަނީ އަޒްމިރަލްދާގެ އިތުރުން ދެން ސަސްޕެންޑްކޮށްފައިވާ ސުޕްރީމް ކޯޓުގެ ފަނޑިޔާރު މަހާޒު އަލީ ޒާހިރާއި ގުޅޭ ދެ މައްސަލައެއް ބަލަމުންނެވެ.
އޭގެތެރެއިން އެ މައްސަލައަކީ ހައި ކޯޓުގެ އެސިސްޓެންޓް ރަޖިސްޓްރާ ހުސައިން މުހައްމަދު ހަނީފް ސުޕްރީމް ކޯޓަށް ހާޒިރުކޮށް، ސުޕްރީމް ކޯޓުގެ އޭރުގެ ފަނޑިޔާރު ހުސްނުއްސުއޫދު "ހުތުރު ބަހުން" ވާހަކަ ދެއްކެވި ކަމަށް ބުނާ މަޖިލީހުގައި އަޒްމިރަލްދާ އާއި މަހާޒު އިންނެވި ކަމަށް ބުނާ މައްސަލައެކެވެ.
އަނެއް މައްސަލައަކީ މަސާޖު ޕާލާއަކުން ހައްޔަރުކުރި އަޒްމިރާލްދާގެ ފިރިކަލުން ޑރ. އިސްމާއިލް ލަތީފުގެ ބަންދާމެދު ގޮތެއް ނިންމަން ހާޒިރުކުރުމުން ފަނޑިޔާރުންތަކަކަށް ނުފޫޒު ފޯރުވިކަމަށް ބުނާ މައްސަލައެކެވެ.
މި ދެ މައްސަލައިގައި ވެސް ދެ ފަނޑިޔާރުން ހާޒިރުކޮށް ޖޭއެސްސީން މިހާރު ވަނީ ބަޔާން ނަގައިފަ އެވެ.