Last Updated: April 4, 22:44
Friday, April 4, 2025
ޚަބަރު

ރާއްޖޭގައި އޮތީ އިޒްރޭލާ އެއްވަރުގެ އަނިޔާވެރި ސަރުކާރެއް

އެމްޑީޕީގެ ރައީސް އަބްދުﷲ ޝާހިދު- ފޮޓޯ: އެމްޑީޕީ

ރާއްޖޭގައި މިހާރު އޮތީ އިޒްރޭލާ އެއްވަރުގެ އަނިޔާވެރި ސަރުކާރެއް ކަމަށް އިދިކޮޅު އެމްޑީޕީގެ ރައީސް އަބްދުﷲ ޝާހިދު ވިދާޅުވެއްޖެ އެވެ.

ޝާހިދު މިހެން ވިދާޅުވީ މިދިޔަ ސަރުކާރުގައި އިއުލާންކުރި ބޯހިޔާވަހިކަމުގެ ސްކީމް، ގެދޮރުވެރިޔާގެ ދަށުން ދޫކުރަން ނިންމާފައި އޮތް 4،000 ފުލެޓުގެ ހައްގުވެރިންނަކީ 1820 މީހުން ކަމަށާއި ކުރީގެ ލިސްޓުން 53 ޕަސެންޓު މީހުންނަށް ދިން ޕޮއިންޓް ސައްހަ ނޫން ކަމަށް މި ސަރުކާރުން ނިންމުމާ ގުޅިގެންނެވެ.

އެކްސްގައި ޝާހިދު އާންމު ކުރެއްވި ވީޑީއޯ މެސެޖެއްގައި ވިދާޅުވީ ޤާނޫނު އަސާސީގެ 40 ވަނަ މާއްދާގެ ށ ގައި ބަޔާންކޮށްފައި ވަނީ މީސްމީހުންގެ މުދަލަކީ ނިގުޅައި ގަނެވޭނޭ އެއްޗެއް ނޫން ކަމަށާއި މީހެއްގެ މުދާ ނަގަން ލާޒިމު ކުރާ ހާލަތެއްގައި ކޯޓުގެ ޙުކުމަކުން ޢަދުލުވެރި ބަދަލެއް ދިނުމަށްފަހުގައި މެނުވީ މީހެއްގެ މުދަލެއް ނުނެގޭނެ ކަމަށެވެ.

އެގޮތުން 4،000 ފުލެޓްގެ ޙައްޤުވެރިން އެމްޑީޕީ ސަރުކާރުން ކަނޑައަޅައިފައިވާ ކަމަށާއި އެއީ އެ ފަރާތްތަކުގެ ހައްގެއް ކަމަށް ޝާހިދު ވިދާޅުވި އެވެ. ނަމަވެސް މިހާރު ފެންނަމުން ދަނީ އިޒްރޭލުގެ ސަރުކާރުން އަމަލުކުރާ ގޮތަށް 4،000 މީހުންގެ ގެދޮރު މި ސަރުކާރުން ނިގުޅައިގަންނަމުންދާ މަންޒަރު ކަމަށްވެސް ވިދާޅުވި އެވެ.

"މިއަދުގެ ސަރުކާރަކީ އިޒްރޭލުގެ ސަރުކާރެކޭ އެއްވަރަށް އަނިޔާވެރި ސަރުކާރެއް ކަމުގައި މިއޮތީ ފެންނަން. މިއީ ބަރަކާތްތެރި ރޯދަ މަސް. މި ބަރަކާތްތެރި ރޯދަ މަހު ރައްޔިތުންގެ ބޯހިޔާވަހިކަން އެ ނިގުޅައިގެންފައި އެވަނީ،" ޝާހިދު ވިދާޅުވި އެވެ.

ޝާހިދު ވަނީ މިއީ ސަރުކާރަށް އެގޮތަށް ކުރެވޭނެ ކަމެއް ނޫން ކަމަށާއި ގާނޫނު އަސާސީގެ އިމުގެ ތެރެއަށް އެނބުރި އަންނަން ސަރުކާރަށް ގޮވާލާފަ އެވެ.