Last Updated: April 4, 06:12
Friday, April 4, 2025
ޚަބަރު

އިޒްރޭލު ޕާސްޕޯޓު މަނާ ނުކުރަން ދައްކަނީ މަކަރުވެރި ބަހަނާ

ޑރ. ޖަމީލް، ފޮޓޯ: މިހާރު

އިޒްރޭލު ޕާސްޕޯޓު މަނާ ނުކުރަން ރައީސް ޑރ. މުހައްމަދު މުއިއްޒު ދައްކަވަނީ މަކަރުވެރި ބަަހަނާތަކެއް ކަމަށް ކުރީގެ ނައިބު ރައީސް ޑރ. މުހައްމަދު ޖަމީލު އަހުމަދު ވިދާޅުވެއްޖެ އެވެ.

ސަރުކާރު ހިންގާ ޕީއެންސީގެ ބޮޑު މެޖޯރިޓީއެއް އޮންނަ ރައްޔިތުންގެ މަޖިލީހުގެ ސަލާމަތީ ހިދުމަތްތަކާބެހޭ ކޮމިޓީން ދާދިފަހުން ވަނީ އިޒްރޭލު ޕާސްޕޯޓު ގެންގުޅޭ މީހުން ރާއްޖެ އެތެރެވުން މަނާކުރުމަށް ހުށަހަޅާފައިވާ އިމިގްރޭޝަން ބިލުގެ މަސައްކަތް މި އަހަރުގެ ޖުލައި މަހުގެ ނިޔަލަށް ދަންމާލަން ފާސްކޮށްފަ އެވެ.

އެކްސްގައި ކުރެއްވި ޕޯސްޓެއްގައި ޖަމީލު ވިދާޅުވީ މަޖިލީހުން ހަތަރު ގަޑިއިރު ތެރޭ ސުޕްރީމް ކޯޓު ފަދަ ބޮޑަތި މުއައްސަސާތައް ފުނޑާލަން ބަދަލު ގެނެވޭކަން މުޅި ގައުމުވެސް ދަންނަ ކަމަށެވެ. އަދި ތިމާގެ އަމިއްލަ ދަރީގެ މަޞްލަޙަތުގައި މުޅި ގައުމު ހަލަބޮލިކޮށްލާ ނިދާފައި ތިބި ވަކީލުންތައް އ.ދ ގެ ކުޑަކުދިންގެ މުޢާހަދާއަށް ޙަވާލާދީ ބަޔާންތައް ނެރޭއިރު، ފަލަސްތީނުގެ އެތަކެއް ކުދިންނެއް ގަތުލު ކުރަމުންދާ އިޒްރޭލުގެ ޕާސްޕޯޓް މަނާ ނުކުރުމަކީ ރައީސް މުއިއްޒުގެ ފަރުވާލެއް ފަލަސްތީނުގެ ރައްޔިތުންނަށް ލިބޭ އަނިޔާމެދު ނެތްކަން ސާބިތުވާ ކަމެއް ކަމަށް ޖަމީލު ވިދާޅުވި އެވެ.

"ކިހާ ދުވަހެއް މިވީ މަކަރުވެރި ގޮތްގޮތަށް އިޒްރޭލުގެ ޕާސްޕޯޓް މަނާކުރަންށޭ ކިޔާފައި ރައީސް މުއިއްޒު ބަހާނާ ދައްކާތާ؟ އިއްޔެ އެކަނިވެސް 400 ވުރެ ގިނަ މަޢްސޫމް ފުރާނަތައް ނައްތާލީ ގާތިލު ނަތަންޔާހޫ،" ޖަމީލު ވިދާޅުވި އެވެ.

ޖަމީލު ވަނީ ރައީސް މުއިއްޒު މިހާރު ހުންނެވީ އިޒްރޭލުގެ ނަތަންޔާހޫ ދެކެ ބިރު ގަނެފައި ކަމަށާއި ރައީސް މުއިއްޒު އިޒްރޭލާއަކު ޑީލު ހަދާފައިކަމަށް ވެސް ތުހުމަތު ކުރެވޭ ކަމަށް ވިދާޅުވެފަ އެވެ.

ގަލޮޅު ދެކުނު ދާއިރާގެ މެންބަރު މީކާއީލު އަހުމަދު ނަސީމް ހުށަހަޅުއްވާފައިވާ ބިލުގައި، އިޒްރޭލުގެ ޕާސްޕޯޓު ގެންގުޅޭ މީހުންނާއި އެހެން ގައުމުތަކުގެ ޕާސްޕޯޓު ގެންގުޅޭ އިޒްރޭލު މީހުން ރާއްޖެ އެތެރެވުން މަނާކުރުމަށް ވަނީ ހުށަހަޅާ އެވެ.