"ގެދޮރުވެރިޔާ" ސްކީމްގެ ދަށުން ކުރިން ލިބޭނެކަން ކަށަވަރުވި ފްލެޓް މި ސަރުކާރުން ނިގުޅައިގެންގައިވާ ކަމަށާއި މި ސަަރުކާރުން ރައްޔިތުންނަސް ދެނީ އަނިޔާ ކަމަށް ކުރީގެ މަޝްހޫރު ފިލްމީ ތަރި މަރިޔަމް ނިޝާ ބުނެފި އެވެ.
އެމްޑީޕީން މި ފަހުން މާލޭގައި ބާއްވަމުން އަންނަ މުޒާހަރާތަކުގައި ވެސް ބައިވެރިވަމުން އަންނަ ބަތަލާ ރާއްޖެ ޓީވީގެ ޕްރޮގްރާމެއްގައި ބުނީ ނުޙައްގުން ރައްޔިތުންނަށް އަނިޔާ ދެނީ ސަރުކާރުން ކަމަށާއި މި ވެރިކަން ފެންނަނީ ބިރުވެރިކޮށް ކަމަށެވެ.
ރާއްޖޭގައި އުފެދުނު އެންމެ އެއް ހުނަރުވެރި އެއް ބަތަލާ އަދި ބޮޑު މަޝްހޫރުކަމެއް ލިބުނު ނިޝާ ބުނީ އޭނަ އަކީ އުމުރުން 14 އަހަރުން ފެށިގެން އާއިލާއެއްގެ ޒިންމާ ނަގަމުން އައި މީހެއް ކަމަށާއި މިއަދު ވަންނާނެ ގެދޮރެއް ނެތި މަގުމަތިވެފައި ވަނީ ސަރުކާރުތަކުން ދީފައިވާ އަނިޔާތަކުގެ ސަބަބުން ކަމަށެވެ.
ނުވަދިހައިގެ ތެރޭގައި ވިދި ބަތަލާ ބުނީ އޭނަގެ މަންމަ ގޯއްޗެއް އޮތަސް އެތަނުން ވެސް ތަންކޮޅެއް ނުލިބި، އެއްވެސް ސަރުކާރަކުން ދިން ބޯހިޔާވަހިކަމުގެ އެއްވެސް ފްލެޓެއް ނުލިބި، މިދިޔަ ސަރުކާރުން ފެށި "ގެދޮރުވެރިޔާ" ސްކީމުން 94 ޕޮއިންޓް ލިބި ފްލެޓް ހައްގުވެފައި ހުއްޓާ މި ސަރުކާރުން އެހައްގު ނިގުޅައިގެންފައިވާ ކަމަށެވެ.
"ނުހައްގުން ތިމާގެ ކިބައިގެން ފޭރިގެންދިޔަ ކިތަންމެ ކުޑަ އެއްޗެއް ނަމަވެސް އޭގެ ހެޔޮ ބަދަލު ﷲ ސުބްހާނަހޫވަތައާލާ އެމީހަކަށް ދެއްވާނެކަން،" ކުރިން ޖުމްހޫރީ ޕާޓީގައި ހުރެފައި އެމްޑީޕީ އަށް ބަދަލުވި ނިޝާ ބުންޏެވެ. "އެއީ މިއަދު އަޅުގަނޑުމެންދަނެ ކަށަވަރު ކުރަންޖެ ހޭނެ ކަމެއް. މި އުޅެނީ ޖިހާދު ކުރާކަށް ނޫން. ލިބެންޖެހޭ ހައްގެއް ހޯދަން."
އޭނަ ބުނީ ބޯހިޔާވަހިކަމަށް ބޭނުންވެފައި ތިބި އެތައް ރައްޔިތުންނެއް މިއަދު ރާއްޖޭގައި އެބަތިބި ކަމަށާއި އުސޫލުގެ ތެރެއިން ލިބިފައި އޮތް ހައްގެއް ނިގުޅައި ނުގަންނަން ސަރުކާރަށް އާދޭސް ކުރާ ކަމަށެވެ.
ހަ ކުދިން ތިބި ނިޝާ ބުނި ގޮތުގައި ރައްޔިތުން ސަރުކާރެއްގެ ކިބައިން އަބަދު ވެސް ބޭނުން ވަނީ ދެތިން ކަމެއް ކަމަށެވެ. އެގޮތުން އަދުލު އިންސާފާއި ހަމަހަމަކަން ކަށަވަރުވުމާއި ބޯހިޔާވަހިކަން ކަށަވަރުވުން ކަމަށް ބުންޏެވެ.
ނިޝާ ވަނީ އަމިއްލަ ބޯހިޔާވަހިކަމެއް ނުލިބި އުޅެން ޖެހިފައިވާ ދަތި ހާލުގެ ވާހަކަ ބައެއް މުޒާހަރާތަކުގައި ވެސް ދައްކައިފަ އެވެ.