Last Updated: April 3, 22:50
Thursday, April 3, 2025
މުނިފޫހިފިލުވުން

ކަރަން ޖޯހަރް އަލަށް ރާއްޖެ އަށް

އިންޑިއާގެ އެންމެ ނުފޫޒު ގަދަ ޑައިރެކްޓަރުންގެ ތެރޭގައި ހިމެނޭ ކަރަން ޖޯހަރް ރާއްޖޭގައި ޗުއްޓީ ހޭދަކުރަމުން އެބަދެ އެވެ.

ވަރަށް ގިނަ ބައެއްގެ ފެވަރިޓެއް ކަމަށްވާ 1998 ގެ "ކުޗް ކުޗް ހޯތާ ހޭ" އިން ޑައިރެކްޝަނަށް ނުކުތް ކަރަން އަކީ މިހާރު ބޮލީވުޑްގެ އެންމެ ކާމިޔާބު އެއް ޕްރޮޑަކްޝަން ހައުސް ކަމަށްވާ ދަރުމާ ޕްރޮޑަކްޝަންގެ ވެރިޔާ ވެސް މެ އެވެ. އެތަނުން އެންމެ ފަހުން ގެނެސްދިން ފިލްމަކީ މި މަހުގެ 7 ގައި ނެޓްފްލިކްސް އިން ޕްރީމިއާކުރި "ނާދާނިޔާން" އެެވެ.

އެ ފިލްމަކީ މަޝްހޫރު އެކްޓަރު ސައިފް އަލީ ޚާންގެ ދޮށީ ފިރިހެން ދަރިފުޅު އިބްރާހީމް އަލީ ޚާން (އިގީ) ތައާރަފުކުރި ފިލްމެވެ.

އަހަރެއްގެ ތެރޭގައި ކަރަން ޕްރޮޑިއުސްކޮށް އަބަދު ވެސް ގިނަ އުފެއްދުންތަކެއް ގެނެސްދޭ އިރު، ދަރުމާ އިން އެންމެ އަވަހަށް ދެން ބެލުންތެރިންނަށް ގެނެސްދޭނީ އަންނަ މަހުގެ 10 ގައި ރިލީޒްކުރާ ޕަންޖާބީ ފިލްމު "އަކާލް" އެވެ.

ވަރަށް ބިޒީ ޕްރޮޑިއުސަރެއްގެ ގޮތުގައި ފާހަގަކޮށްލެވޭ ކަރަންގެ ރާއްޖޭގެ ފުރަތަމަ ދަތުރުގައި ޗުއްޓީ ހޭދަކުރަމުން އަންނަނީ ޖުމެއިރާ އޮޅަހަލި އައިލޭންޑް ރިސޯޓްގަ އެވެ. މި ދަތުރުގެ ވާހަކަ އޭނަ އިންސްޓަގްރާމް ސްޓޯރީގައި ހިއްސާކޮށްފައިވެ އެވެ. ކަރަން ރާއްޖެ އައީ އިއްޔެ އެވެ.

ބެލުންތެރިން ވަރަށް އިތުބާރު ކުރާ ޑައިރެކްޓަރެއްގެ ގޮތުގައު ފާހަގަކޮށްލެވޭ ކަރަން އެންމެ ފަހުން ޑައިރެކްޓްކޮށް ގެނެސްދިން ފިލްމަކީ 2023 ގެ "ރޮކީ އޯރް ރާނީ ކީ ޕްރޭމް ކަހާނީ" އެވެ. އޭނަ ޑައިރެކްޓްކުރި ފިލްމުތަކުގެ ތެރޭގައި ކަބީ ހުޝީ ކަބީ ޢަމް (2001)، ކަބީ އަލްވިދާ ނާ ކެހެނާ (2005)، މައި ނޭމް އިޒް ޚާން (2010)، ސްޓޫޑެންޓް އޮފް ދި އިޔާ (2012) އަދި 2016 ގެ އޭ ދިލް ހެ މުޝްކިލް (2016) އެވެ.

ކަރަން ރާއްޖެ އައި އިރު، ރާއްޖޭގެ "ނޮވެމްބަރު 3" ގެ ހާދިސާ އަށް ބިނާކޮށް އޭނަގެ ދަރުމާ އިން ސަލްމާން ޚާން ހިމަނައިގެން "ދަ ބުލް" ގެ ނަމުގައި ފިލްމެއް ހަދަން 2023 ގެ ތެރޭގައި ޕްލޭންކުރި އެވެ. އެކަމަކު އެ ފިލްމު ހުއްޓުނީ ރާއްޖޭގެ ސަރުކާރަށް ނިސްބަތްވާ ބަޔަކު އިންޑިއާގެ ބޮޑުވަޒީރު ނަރެންދުރަ މޯދީއަށާއި އިންޑިއާ އަށް ކުޑައިމީސްކޮށް ސޯޝަލް މީޑިއާގައި ދެއްކި ވާހަކަތަކަކާ ގުޅިގެން ދެ ގައުމުގެ ގުޅުން އޭރު ގޯސްވުމުން ކަމަށް މީޑިއާތަކުން ރިޕޯޓްކޮށްފައިވެ އެވެ.