އިމިގްރޭޝަން ކޮންޓްރޯލާގެ މަގާމުން މުހައްމަދު ޝަމްއާން ވަހީދު މިއަދު ވަކިކޮށްފި އެވެ.
މައުލޫމާތު ލިބިފައިވާ ގޮތުގައި ރައީސް ޑރ. މުހައްމަދު މުއިއްޒު ޝަމްއާން މަގާމުން ވަކިކުރަން ނިންމެވީ މިއަދު އެވެ. ނަމަވެސް މަގާމުން އޭނާ ވަކިކުރި ސަބަބެއް އެނގިފައެއް ނުވެ އެވެ.
ޝަމްއާން މަގާމުން ވަކިކުރިއިރު ފުލުހުން މިރޭ ވަނީ، މޯލްޑިވްސް އިމިގްރޭޝަންގެ ބައެއް މުވައްޒަފުން މަގާމުގެ ނުފޫޒު ބޭނުންކޮށްގެން ބިދޭސީންގެ އަތުން ނާޖާއިޒް މަންފާ ހޯދަމުންދާ ކަމުގެ މައުލޫމާތު ލިބިގެން އެކަމާ ގުޅޭ ތަހުގީގެއް ފަށާފައިވާކަން ހާމަކޮށްފަ އެވެ.
މި މައްސަލައާ ގުޅިގެން ރޭ މާލޭ ގެއެއް ބަލައި ފާސްކޮށް ތިން މީހަކު ފުލުހުންގެ ބެލުމުގެ ދަށަށް ގެންގޮސްފައިވާ ކަމަށް ފުލުހުން ވަނީ ބުނެފަ އެވެ.
އިމިގްރޭޝަން ކޮންޓްރޯލްގެ މަގާމަށް ޝައްމާން އައްޔަންކުރީ 2023، ނޮވެމްބަރު 19 ގަ އެވެ. އޭނާ އަކީ މީގެކުރިން ވެސް ގިނަ ދުވަސްތަކެއް ވަންދެން އިމިގްރޭޝަނުގައި ވަޒީފާ އަދާކުރި ފަރާތެކެވެ.