Last Updated: April 3, 22:50
Thursday, April 3, 2025
ޚަބަރު

ދެ ކިލޯގެ ޑްރަގާ އެކު 3 މީހަކު ހައްޔަރުކޮށްފި

މަސްތުވާތަކެތީގެ ވިޔަފާރިކުރާ ބަޔަކު ދެ ކިލޯ މަސްތުވާތަކެއްޗާ އެކު ހައްޔަރުކޮށްފި އެވެ.

އެ މީހުންގެ ބަންދަށް ކްރިމިނަލް ކޯޓުން ރޭ 15 ދުވަސް ޖަހާފައިވާ އިރު، އޭގެ ތެރޭގައި ހިމެނެނީ 46 އަހަރުގެ ފިރިހެނަކާއި 35 އަހަރުގެ އަންހެނެއްގެ އިތުރުން 39 އަހަރުގެ ފިރިހެނެކެވެ. ތިން މީހުންނަކީ ވެސް ދިވެހިންނެވެ.

ބަންދު އަމުރުގައިވާ ގޮތުން އެ މީހުން ތިބި ތަނުން ގިނަ އަދަދެއްގެ އެކި ބާވަތްތަކުގެ މަސްތުވާތަކެތި ފެނިފައިވާ އިރު، އެ ތަކެތީގެ ބަރުދަނުގައި ދެ ކިލޯ ވަރު ހުންނާނެ އެވެ.

އެހެންވެ އެ މީހުންގެ މައްޗަށް ފުލުހުން ކުރަނީ މަސްތުވާތަކެތި ބޭނުންކުރުމާއި ޓްރެފިކް ކުރުމުގެ ތުހުމަތެވެ.

މައްސަލައިގައި ހައްޔަރުކުރި އަންހެން މީހާ ބުނީ މަސްތުވާތަކެއްޗާ އޭނައާ ގުޅުމެއް ނެތް ކަމަށާއި އެތަކެތި ފެނުނު ތަނަށް ދިޔައީ ބައެއް ކަންކަމުގައި އެހީތެރިވުމަށް ކަމަށެވެ. އެކަމަކު އޭނަ ހައްޔަރުކޮށް ޓެސްޓްކުރި މަސްތުވާތަކެއްޗަށް ޕޮޒިޓްވްވެފައިވެ އެވެ.