ދައުލަތުގެ އާންމު މަންފާއަށްޓަކައި ހާސިލުކުރަން ބޭނުންވާ އިގުތިސޯދީ ސިޔާސަތެއްގެ ދަށުން ހިންގާނޭ މުހިންމު މަޝްރޫއުތައް ކަނޑައެޅުމަށް އެކަށައެޅި ގަރާރު ރައީސް ޑރ. މުހައްމަދު މުއިއްޒު އިސްލާހު ކުރެއްވިއިރު އެ ގަރާރުގައި އައްޑޫ ސިޓީ ހިތަދޫ އާއި ހުޅުމީދޫ ގުޅުވާލާ ބްރިޖުގެ މަސައްކަތް ނުހިމެނޭކަން ހާމަވެއްޖެ އެވެ.
ސަރުކާރުން ކުރިއަށް ގެންދާ މަޝްރޫއުތަކަކަށް ފައިސާ ހޯދަން ރައީސް މުއިއްޒު މިއަދު ނެރުއްވި ގަރާރުގައި 25 މަޝްރޫއެއް ހިމަނާފައިވެ އެވެ.
އެ މަޝްރޫއުތަކުގެ ތެރޭގައި ރައީސް މުއިއްޒު އައްޑޫ އަށް ވެވަޑައިގެންނެވި އެންމެ ބޮޑު ވައުދު ކަމަށްވާ އައްޑޫ ބްރިޖު މަޝްރޫއު ހިމަނާފައެއް ނުވެ އެވެ. އެ ގަރާރުގައި އައްޑުއާ ގުޅޭ ކަމަކަށް ހިމަނާފައި އޮތީ އައްސޭރި ޓޫރިޒަމް މަޝްރޫއެވެ. އެ މަޝްރޫއު އަށް 4 މިލިއަން އެމެރިކާ ޑޮލަރު ހޯދަން ވަނީ ހިމަނާފަ އެވެ.
ސަރުކާރުގެ މުހިއްމު މަޝްރޫއުތަކުގެ ތެރޭގައި އައްޑު ބްރިޖު ހިމަނާފައި ނުވާއިރު، ހުވަދޫ އާއި ހައްދުންމަތީގައި ގިނަ އަދަދަކަށް އެއާޕޯޓުތައް ތަރައްގީ ކުރަން ވަނީ ހިމަނާފަ އެވެ.
އައްޑޫ ބްރިޖު މަޝްރޫއުގެ އަމަލީ މަސައްކަތް މި އަހަރު ފަށާނެ ކަމަށް ސަރުކާރުން އިއުލާންކޮށްފައިވާއިރު ފިނޭންސް މިނިސްޓްރީން ދާދިފަހުން ވަނީ ބްރިޖު ޕްރޮޖެކްޓްގެ ސާވޭ، ޑިޒައިން އަދި ޓެންޑަ ޑޮކިއުމަންޓް، ޓެކްނިކަލް ސްޕެސިފިކޭޝަންއާ ގުޅޭ މަސައްކަތްތަކަށް ކޮންސަލްޓަންސީ ދޭނެ ފާމެއް ހޯދަން އިއުލާންކޮށްފަ އެވެ.
މިފަދަ އިއުލާނެއް ފިނޭންސުން ކޮށްފައިވާއިރު މިދިޔަ އަހަރުގެ މާޗު މަހު ކޮންސްޓްރަކްޝަން މިނިސްޓްރީން އެކްސްގައި ވަނީ ބްރިޖު މަޝްރޫއުގެ ޕްރިލިމިނަރީ ޑިޒައިން އަދި ސާވޭގެ މަސައްކަތް ކުރުމަށް ހަވާލުކޮށްފައިވާ ކުންފުނިން ސާވޭގެ މަސައްކަތް ނިންމާފައިވާ ކަމަށް ބުނެ ޕޯސްޓެއްކޮށްފަ އެވެ. އެ މަސައްކަތް ކުރުމަށް ހަވާލުކުރީ މިސްރުގެ "ދަ އަރަބް ކޮންޓްރެކްޓާސް – އޮސްމާން އަހުމަދު އޮސްމާން އެންޑް ކޯ"އާ އެވެ.
އައްޑޫ ބްރިޖު ސާވޭގެ މަސައްކަތްތައް ކުރި އަރަބް ކޮންޓްރެކްޓާސް ގްރޫޕުން ވޭތުވެދިޔަ އެއް އަހަރުތެރޭ ކުރި މަސައްކަތަށް ވީނުވީއެއް ސަރުކާރުން މިހާތަނަށް ހާމަކޮށްފައެއް ނުވެ އެވެ.