ރާއްޖޭގައި މިހާރު އާންމު ވާހަކަ އަކީ ވައްކަމާއި ވަގުންގެ ވާހަކަ އެވެ. ހާއްސަކޮށް މިހާރު ގަދައީ މަތީ ފަޑީގައި ކުރެވޭ ވައްކަމުގެ ވާހަކަ އެވެ. އެހެންވެ ވެރިންނަށް ވަގުންނަށް ގޮވާކަށް މިހާރު އެއްވެސް މީހަކު ޖެހިލުމެއް ވެސް ނުވެ އެވެ.
ފަތިސް ނަމާދުކޮށްލައިގެން ގޮސް ސަރުކާރުގެ ވެރިން ވައްކަން ކުރާ ވާހަކަ އާއި ޓައި އަޅައިގެން ތިބެ ކުރާ ވައްކަމުގެ ވާހަކަ އަކީ މިހާރު ދިވެހިންނަށް ވަރަށް ފަރިތަ ވާހަކަތަކެވެ.
ޑރ. މުހައްމަދު މުއިއްޒުގެ ސަރުކާރު ވެރިކަމަށް އައި އިރު، އެންމެ ބޮޑަށް ދެއްކި އެއް ވާހަ އަކީ ރައީސް އިބްރާހީމް މުހައްމަދު ސޯލިހު ސަރުކާރުގެ ކޮރަޕްޓް ވާހަކަ އާއި އެ ސަރުކާރުގެ ވެރިން އިންތިހާ އަށް ވައްކަންކުރިކަމުގެ ވާހަކަ އެވެ. އެހެންވެ ގިނަ ބަޔަކު އުންމީދުކުރީ މި ސަރުކާރާ ހަމައިން އެ އަޑުތައް ހިނދި، ގައުމުގެ "ހަޒާނާ" ރައްކާތެރި ކުރެވޭނެ ކަަމަށެވެ.
އެހެންވެ ސަރުކާރަށް އަހަރު ވެސް ނުވަނީސް ވައްކަމާއި ކޮރަޕްޝަންގެ ވާހަކަ މާ ގަދަ ވެއްޖެ އެވެ. ސަރުކާރުގެ އެތައް ކުންފުންޏަކާއި އެތައް މުއައްސަސާއެއްގެ ހާލަތު މިހާރު އޮތް ގޮތާ މެދު ރައްޔިތުންނަށް އޮތީ ކަންބޮޑުވުމާއި ފިކުރު ކުރަން އިންތިހާ އަށް ޖެހިފަ އެވެ. ރައީސް މުއިއްޒު ކިތަންމެ ބާރަށް މި ސަރުކާރުން ކޮރަޕްޝަނާއި ހިޔާނާތާއި ވައްކަމަށް ފުރުސަތު ނުދެއްވާނެ ކަމަށް ކިތަންމެ ވަރަކަށް ވިދާޅުވިޔަސް އެކަން ގަބޫލު ކުރާނެ މީހުން މިހާރު މަދުވެއްޖެ އެވެ.
މި ސަރުކާރު ފެށިގެން އައި އިރު، އެކިއެކި މުސއްސަސާތަކާއި ސަރުކާރު ހިއްސާވާ ކުންފުނިތަކުގެ ކިތައް އިސްވެރިން މަގާމުން ދުރުކޮށްފި ހެއްޔެވެ؟ ދުވަހެއް ނިމިގެންދާ އިރު، ކޮންމެވެސް ތަނެއްގެ ވެރިޔަކު ވަކިކުރި ވާހަކަ މީޑިއާތަކުގެ ސުރުހީތަކަށް ނާރާ ދުވަހެއް ނާދެ އެވެ.
މީގެ ފަހަތުގައި އޮތީ ހަމަ ހަގީގަތުގައި ވެސް ހިޔާނަތާއި މަކަރާއި ކޮޕަރްޝަނާއި ވައްކަމެވެ. ހަމަމިއާ އެކު ނާޖާއީދު ފައިދާ ނަގާކަމުގެ ތުހުމަތު ކިތައް ވެރިންގެ މައްޗަށް އެބަ ކުރެވޭ ހެއްޔެވެ؟
މި ސަރުކާރު ވެރިކަމަށް އައުމާ އެކު އެންމެ ރަނގަޅަށް ފަންކްޝަންކުރާ އެއް މުއައްސަސާގެ ގޮތުގައި ފާހަގަކޮށްލެވުނީ އިމިގްރޭޝަނެވެ. ރާއްޖޭގައި އެންމެ ބޮޑުވެފައި އޮތް ގަވާއިދާ ހިލާފު ބިދޭސީންގެ މައްސަލަ ހައްލެއް ހޯދަން އެ އިދާރާ އިން ފެށި މަސައްކަތައް ރައްޔިތުންގެ ތައުރީފާއި ޝުކުރު ވެސް އޮހުނެވެ.
އެކަމަކު އެންމެ ފަހުން އެތަނުގެ ތެރެއިން ވެސް ވައްކަމެވެ.
އިމިގްރޭޝަން ކޮންޓްރޯލަރުގެ މަގާމުގައި ހުންނެވި މުހައްމަދު ޝަމާން މަގާމުން ވަކިކޮށް، މިހާރު ހުރީ ހައްޔަރުގަ އެވެ. ތުހުމަތަކީ ބިދޭސީންގެ އަތުން ފައިސާ ނެގުމެވެ. މިއީ ގަވާއިދާ ހިލާފު ބިދޭސީން އަތުލައިގަންނަން ނުކުތް ވެރިޔާގެ ވެސް ހާލަތެވެ. ދެން ރައްޔިތުން އިތުބާރު ކުރަންވީ ކޮން އިދާރާއަކަށް ކޮން ވެރިއަކަށް ހެއްޔެވެ؟
Here's a bit of advice, arresting and deporting poor expats who had been trafficked is not the solution to stop trafficking of expat workers, on the contrary, it's aiding traffickers directly by giving them the opportunity to traffic more workers.
Let me explain.
Many people…— Maaniu. 🇲🇻 (@yoosufmaaniu) March 21, 2025
ގައުމުގެ ހަތަރު ފަރާތުން ރައްޔިތުންނަށް ގޮވަން ޖެހިފައި އޮތީ ވަގުންނަށް ވަގަށް ގޮވުމުގެ ވާހަކަ އެވެ. ނުގޮވާންވީ ސަބަބެއް ވެސް ނެތެވެ. އެވެރިން މުސާރަ ނަގަނީ ރައްޔިތުންގެ ޓެކްސް ފައިސާއިންނެވެ. އެހެންވީމާ ރައްޔިތުންގެ ފައިސާ އިން ވައްކަންކޮށް، މުއްސަނދިކަން ހޯދާ ނަމަ ވަގަށް ނުގޮވައި ރައްޔިތުންނަކަށް ހިމޭނަކުން ނުތިބެވޭނެ އެވެ.
މި ސަރުކާރު އައި ފަހުން އެޗްޑީސީ އާއި ފެނަކަ އާއި އެންސްޕާ އާއި އެމްޓީސީސީ އާއި މިފްކޯ އާއި ސަރުކާރުގެ އެތައް އިދާރާއެއްގެ މަތީީ ފަޑިއަށް ގެންނަން ޖެހުނު އަވަސް ބަދަލުތަކާ އެކު، މި ސަރުކާރުގެ ތެރޭގައި ކަންކަން ހިނގާ ގޮތް ރަނގަޅު ނޫންކަން އެންމެ އާދައިގެ މީހާ އަށް ވެސް އެނގޭނެ އެވެ.
އަނެއްކޮޅުން ހޯމްމޭންޑް މިނިސްޓްރީގެ ދަށުން ހިންގަމުން އަންނަ ޑިޕާޓްމަންޓް އޮތް ރަޖިސްޓްރޭޝަން (ޑީއެންއާރް) ގެ ޑޭޓާ ސިސްޓަމަށް އެކްސެސްވެ، އެއިން ވައްކަން ސަރުކާރު ހިންގާ ޕާޓީ، ޕީއެންސީ އަށް އެތައް ބަޔަކު ވެސް ވަގަށް ވައްދައިފި އެވެ. ގިނަ ބަޔަކު ތުހުމަތު ކުރާ ގޮތުގައި މިކަމުގެ މުގުލުގައި ހުންނެވީ ސީދާ ހޯމްލޭންޑް މިނިސްޓަރު އަލީ އިހުސާނެވެ.
މިހެން ގޮސް ދައްކަން ވެއްޖެ ނަމަ ދައްކަން ހުރީ ހުސް މިފަދަ ވާހަކަތަކެވެ. މިއީ ކޮޅަކުން ލާނެ ވާހަކަ އެވެ. ސިޔާސީ މީހުން އެ މީހުންގެ ޖީބު ބަރުކުރަމުންދާ އިރު، ރައްޔިތުން ތިބި ހަގީގީ ހާލަތާ މެދު ނިކަން ވިސްނައިލުން ކީއްތޯ އެވެ؟