ތެލެސީމިއާ އަށް ފަރުވާ ހޯދަމުންދާ ބަލިމީހުންނާ މެދު ފަރުވާ ކުޑަކުރުމަކީ ސަރުކާރުގެ ބޮޑު އިހުމާލެއް ކަމަށް އެމްޑީޕީގެ ޗެއާޕާސަން ފައްޔާޒު އިސްމާއިލް ވިދާޅުވެއްޖެ އެވެ.
ތެލެސީމިއާއަށް ފަރުވާ ހޯދަމުންދާ ބަލި މީހުންނާއި އެ މީހުންގެ އާއިލާތަކުން މޯލްޑިވްސް ބްލަޑް ސާވިސަސް (އެމްބީއެސް) ކައިރީ މިރޭ އަންނަނީ މުޒާހަރާ ކުރަމުންނެވެ. މުޒާހަރާ ކުރަމުން އަންނަނީ ފިލްޓަރުތައް ހަލާކުވުމުގެ ސަބަބުން ގިނަ އަދަދެއްގެ ލޭ ޕެކެޓުތަކެއް އުކާލަން ޖެހުން ފަދަ ކަންކަމަށް ހައްލެއް ނުލިބި ދިގުލައިގެން ގޮސްފައިވާތީ އެވެ.
މިކަމާ ގުޅިގެން އެކްސްގައި ކުރެއްވި ޕޯސްޓެއްގައި ފައްޔާޒު ވިދާޅުވީ ތެލެސީމިއާއަށް ފަރުވާ ހޯދަމުންދާ ބަލިމީހުންނާ މެދު މިހާ ބޮޑަށް ފަރުވާ ކުޑަކުރުމަކީ ސަރުކާރުގެ ބޮޑު އިހުމާލެއް ކަމަށެވެ. އަދި ހާއްސަ އަހަންމިއްޔަތު ކަމެއް ދީގެން ބަލަހައްޓަން ޖެހޭ ކަމެއް ސަރުކާރުގެ ނާގާބިލުކަމުގެ ސަބަބުން ބޮއްސުންލައި ގޮސް އެތައް ފުރާނައެއް ނުރައްކަލަށް ހުށަހެޅުމަކީ ޒިންމާ ސަރުކާރުން ނަގަން ޖެހޭ ކަމެއް ކަމަށް ފައްޔާޒު ވިދާޅުވި އެވެ.
މިފަދަ ހާލަތެއް ތަކުރާރު ނުވާނެކަން ސަރުކާރުން ކަށަވަރު ކުރަން ޖެހޭ،" ފައްޔާޒު ވިދާޅުވި އެވެ.
މުޒާހަރާ ފެށުމުގެ ކުރިން އެ ސެންޓަރުގެ މެނޭޖުމަންޓާ އެކު މިރޭ ބައްދަލުވުމެއް ވެސް ބޭއްވި އެވެ. ނަމަވެސް އެ ބައްދަލުވުމުން ވެސް އެއްވެސް ކަމަކަށް ހައްލެއް ނުލިބުމުން މުޒާހަރާ ފެށިއިރު، މުޒާހަރާގެ ބައިވެރިން އަންނަނީ އެ ސެންޓަރުގެ އިސްވެރިންގެ އިސްތިއުފާ އަށް ވެސް ގޮވާލަމުންނެވެ.