ރައްޔިތުންގެ އެއްވެސް ހައްގަކަށް ހުރުމަތްތެރިކޮށް ހިތުމުގެ ވިސްނުމެއް މި ސަރުކާރުގައި ނެތް ކަމަށް އެމްޑީޕީގެ ރައީސް އަބްދުﷲ ޝާހިދު ވިދާޅުވެއްޖެ އެވެ.
ތެލެސީމިއާއަށް ފަރުވާ ހޯދަމުންދާ ބަލި މީހުންނާއި އެ މީހުންގެ އާއިލާތަކުން މޯލްޑިވްސް ބްލަޑް ސާވިސަސް (އެމްބީއެސް) ކައިރީ ރޭ ވަނީ މުޒާހަރާކޮށްފަ އެވެ. މުޒާހަރާކޮށްފައިވަނީ ފިލްޓަރުތައް ހަލާކުވުމުގެ ސަބަބުން ގިނަ އަދަދެއްގެ ލޭ ޕެކެޓުތަކެއް އުކާލަން ޖެހުން ފަދަ ކަންކަމަށް ހައްލެއް ނުލިބި ދިގުލައިގެން ގޮސްފައިވާތީ އެވެ.
މިކަމާ ގުޅިގެން އެކްސްގައި ކުރެއްވި ޕޯސްޓެއްގައި ޝާހިދު ވިދާޅުވީ ތެލެސީމިއާގެ ފަރުވާގެ ބޭނުން ޖެހިފައިވާ ކުޑަކުދީންނާއި މީހުންނަކީ ދައުލަތުން ޚާއްސަ ގޮތެއްގައި އެހީ ފޯރުކޮށްދޭންޖެހޭ ބައެއް ކަމަށާއި އެފަރާތްތަކަށް ބޭނުންވާ ފުރިހަމަ އެހީތެރިކަން ފޯރުކޮށް ދިނުމަކީ ދައުލަތުގެ މައްޗަށް ލާޒިމު ކަމެއް ކަމަށެވެ.
ނަމަވެސް ރައްޔިތުންގެ އެއްވެސް ޙައްޤަކަށް ހުރުމަތްތެރިކޮށް ހިތުމުގެ ކުޑަވެސް ވިސްނުމެއް މި ސަރުކާރުގައި ނެތްކަން އެނގި ކަށަވަރު ވަމުންދާ ކަމަށް ޝާހިދު ވިދާޅުވި އެވެ. އެގޮތުން ރައްޔިތުން ކޮންމެ ދުވަހަކުމެ ނުކުމެ ތިބެން މިޖެހެނީ ކޮންމެވެސް ޙައްގެއް ހޯދުމަށް އެދި އާދޭސް ކުރުމުގައި ކަމަށްވެސް ވިދާޅުވި އެވެ.
ތެލެސީމިޔާގެ ފަރުވާ ގެ ބޭނުން ޖެހިފައިވާ ކުޑަކުދީންނާއި މީހުންނަކީ ދައުލަތުން ޚާއްސަ ގޮތެއްގައި އެހީ ފޯރުކޮށްދޭންޖެހޭ ބައެއް! އެފަރާތްތަކަށް ބޭނުންވާ ފުރިހަމަ އެހީތެރިކަން ފޯރުކޮށް ދިނުމަކީ ދައުލަތުގެ މައްޗަށް ލާޒިމު ކަމެއް!
ނަމަވެސް ރައްޔިތުންގެ އެއްވެސް ޙައްޤަކަށް… https://t.co/PJ8SmVi9mn— Abdulla Shahid (@abdulla_shahid) March 22, 2025
މުޒާހަރާ ފެށުމުގެ ކުރިން އެ ސެންޓަރުގެ މެނޭޖުމަންޓާ އެކު މިރޭ ބައްދަލުވުމެއް ވެސް ބޭއްވި އެވެ. ނަމަވެސް އެ ބައްދަލުވުމުން ވެސް އެއްވެސް ކަމަކަށް ހައްލެއް ނުލިބުމުން މުޒާހަރާ ފެށިއިރު، މުޒާހަރާގެ ބައިވެރިން ވަނީ އެ ސެންޓަރުގެ އިސްވެރިންގެ އިސްތިއުފާ އަށް ވެސް ގޮވާލަމުންނެވެ.