ތެލަސީމިއާ ސެންޓަރުގެ ބައެއް ޚިދުމަތްތަކާއި ގުޅިގެން ތެލަސީމިއާ ކުދިންނާއި އެ ކުދިންގެ ބެލެނިވެރިންގެ ކަންބޮޑުވުންތަކާ ގުޅިިގެން ރައީސް ޑރ. މުހައްމަދު މުއިއްޒު މިއަދު ސެންޓަރަށް ޒިޔާރަތް ކުރައްވައި އެތަނުގައި ހުރި މައްސަލަތައް އޮޅުންފިލުއްވައިފި އެވެ.
ރައީސް މިއަދު އެތަނަށް ޒިޔާރަތްކުރެއްވީ ތެލަސީމިއާ ކޮމިއުނިޓީން ރޭ ކަންބޮޑުވުންތައް ފާޅުކޮށް މުޒާހަރާ ވެސް ކޮށްފައި ވަނިކޮށެވެ. އެގޮތުން ތެލަސީމިއާ ކުދިން ލޭ އެޅުމަށްޓަކައި ލޭ ސާފުކުރުމަށް ބޭނުންކުރާ ފިލްޓަރުތަކުގައި މައްސަލަ އުޅޭކަމުގެ ކަންބޮޑުވުންތައް ފާޅުކޮށްފައިވެ އެވެ.
ރައީސް ތެލަސީމިއާ ސެންޓަރަށް ޒިޔާރަތްކުރެއްވި ޒިޔާރަތް ކުރައްވައި އެތަނުގެ ހުރިހާ ޑިޕާޓްމަންޓުތަކެއްގެ ޙާލަތު ވެސް ބެއްލެވި އެވެ. އަދި ސެންޓަރުގައި ޚިދުމަތް ހޯދަމުން ދިޔަ ކުދިންނާއި އެ ކުދިންގެ އާއިލާތަކާ ވެސް ބައްދަލުކުރެއްވައި ކަންބޮޑުވުން އަޑު އެއްސެވި އެވެ.
ރައީސް ވަނީ ފާޅުކުރި ކަންބޮޑުވުންތަކަށް މިވަގުތުން ފެށިގެން ޙައްލުކުރެވެން ހުރި ހުރިހާ ކަމެއް ޙައްލުކުރުމަށް ކަމާބެހޭ އިދާރާތަކުގެ ވެރިންނަށް މަޝްވަރާކުރައްވައިގެން ފިޔަވަޅުތައް އަޅުއްވަން ފައްޓަވާފައިވާ ކަމަށް ވިދާޅުވި އެވެ.
މޯލްޑިވިއަން ބްލަޑް ސާވިސް (އެމްބީއެސް) އިން ބުނީ ރާއްޖޭގައި އާންމުކޮށް ލޭ އެޅުމަށް ބޭނުންކުރާ ފިލްޓަރިތައް އުފައްދާ ބޭރުގެ ކުންފުނި ވިއްކާލުމާއި ގުޅިގެން އެ ކުންފުނިން މިހާރު ހިމޮނޮޓިކްސް ބްލަޑް ފިލްޓަ އުފެއްދުން ހުއްޓާލާފައިވާ ކަމަށެވެ. އެހެންކަމުން ސީދާ އެ ބާވަތުގެ ފިލްޓަރި ތައްޔާރުކޮށް ސަޕްލައިކު ރެވޭނެ ދުވަހެއް ކަނޑައެޅިގެން ނޭނގޭ ކަމަށް މިދިޔަ މަހުގެ 25 ވަނަ ދުވަހު އަންގާފައިވާ ކަމަށެވެ.