ތެލަސީމިއާ ސެންޓަރުގެ ހާލަތު މިހާތަނަށް އައިއިރު އޮތީ ނޭނގި ކަމަށާއި އެ ސެންޓަރަށް ދިމާވެފައިވާ ދަތިތައް ހައްލުކޮށްދެއްވާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.
ރައީސް މިހެން ވިދާޅުވީ ތެލަސީމިއާ ސެންޓަރުގެ ބައެއް ޚިދުމަތްތަކާއި ގުޅިގެން ތެލަސީމިއާ ކުދިންނާއި އެ ކުދިންގެ ބެލެނިވެރިންގެ ކަންބޮޑުވުންތަކާ ގުޅިިގެން ރައީސް މިއަދު އެ ސެންޓަރަށް ޒިޔާރަތް ކުރެއްވުމަށް ފަހު ދެއްވި އިންޓަވިއުއެއްގަ އެވެ.
އެ އިންޓަވިއުގައި ރައީސް ވިދާޅުވީ 2017 ވަނަ އަހަރުން ފެށިގެން ތެލަސީމިއާ ސެންޓަރު ހިންގަމުންދަނީ ޑިރެކްޓާ ޖެނެރަލެއް ނުލާ ކަމުން އެކަން ވަގުތުން ހައްލުކުރަން އިރުޝާދު ދެއްވާފައިވާ ކަމަށެވެ. އަދި ނަރުހުން މަދުވުމާއި، ސީނިއާ ފިޒިޝިއަނެއް ހަމަޖެއްސުމަށާއި، ތަނަށް ބޭނުންވާ އެކި ކަހަލަ އާލާތް ހޯދޭނެ ގޮތާއި، ލެބް ޓެކްނީޝަނުންނާއި އެކިއެކި މުވައްޒަފުން ހަމަޖެއްސުމަށް މަޝްވަރާކުރެއްވި ކަމަށް ރައީސް ވިދާޅުވި އެވެ.
މީގެއިތުރުން އައިޖީއެމްއެޗް ނޫނީ އެހެނިހެން ހޮސްޕިޓަލްތައް ފަދައިން ތެލަސީމިއާ ސެންޓަރުގެ ޚިދުމަތްތަކަށް ގަޑިތައް އިތުރުކުރުމަށް ބޭނުންވާނެ ހިއުމަން ރިސޯސަސް އިތުރުކުރުމަށް ވެސް މިއަދު މަޝްވަރާކޮށް، އެކަން ކުރިއަށް ގެންދަންވީ ގޮތް ކަނޑައަޅާފައިވާނެ ކަމަށް ވިދާޅުވި އެވެ.
"މިގޮތަށް މިކަންކަން އޮތްކަން އަދި މިހިސާބަށް އައިއިރު ވެސް، އެއްވެސް ވަރެއްގެ ކުރިއެރުމެއް ނާންނަކަން އަޅުގަނޑަށް ނޭނގި އޮތީ،" ރައީސް ވިދާޅުވި އެވެ.
ރައީސް ވަނީ ސަރުކާރުގެ އެކި ފަރާތްތަކާ ތެލަސީމިއާ ސެންޓަރުން ބައްދަލުކޮށްފައިވާ ކަމަށާއި ނަމަވެސް ކުރިއެރުމެއް އަމަލީ ސިފައެއް އައިސްފައި ނުވާ ކަމަށްވެސް ވިދާޅުވެފަ އެވެ.