ބަރަކާތުގެ މައްޗަށް ބަރަކާތް ލެއްވިގެންވާ ރަމަޟާން މަހުގައި ހިމެނޭ އެންމެ ބަރަކާތްތެރި ރެއަކީ ޤަދްރި ވިލޭރެއެވެ. އެއީ ކީރިތި ޤުރުއާން ބާވާލެއްވުނު ރެއެވެ. މާތް ﷲ ވަޙީކުރެއްވިއެވެ.
إِنَّا أَنزَلْنَاهُ فِي لَيْلَةٍ مُّبَارَكَةٍ إِنَّا كُنَّا مُنذِرِينَ (3) فِيهَا يُفْرَقُ كُلُّ أَمْرٍ حَكِيمٍ (4) (ސޫރަތުއް ދުޚާން 3-4)
މާނައީ: “ހަމަކަށަވަރުން، ތިމަންއިލާހު އެޤުރުއާން ބާވައިލެއްވީ ބަރަކާތްތެރިވެގެންވާ ރެޔެއްގައެވެ. ހަމަކަށަވަރުން، އިންޛާރު ކުރައްވާ ކަލަކު ކަމުގައި ތިމަންއިލާހު ވޮޑިގެންވަމެވެ . އެ ރޭ، ކަނޑައެޅިގެންވާ ކޮންމެކަމެއް ބަޔާންކުރައްވައެވެ.”
އެރެއަކީ ކޮންރެއެއްކަން ކަނޑައެޅިގެން އަޅުގަނޑުމެންނަށް ނޭނގުނު ކަމުގައި ވިޔަސް އެރޭގެ ބައެއް ޢަލާމާތްތައް ރަސޫލު ﷲ صلى الله عليه وسلم ވަނީ ބަޔާން ކޮށްދެއްވާފައެވެ.
ލައިލަތުލްޤަދްރި ވަނީ ފަހު 10 ގެ އޮނަހިރި ރެއެއްގަ އެވެ.
އަބޫ ސަޢީދު(ރަޟިޔަﷲ ޢަންހު)ގެ އަރިހުން ރިވާވެގެންވެ އެވެ. އެކަލޭގަފާނު ވިދާޅުވިއެވެ. ރަމަޟާންމަހުގެ ވިހިވަނަދުވަހު ހެނދުނު ޚުޠުބާއެއް ދެއްވަމުން ރަސޫލު ﷲ صلى الله عليه وسلم ޙަދީޘްކުރެއްވިއެވެ. “ إِنِّي أُرِيتُ لَيْلَةَ الْقَدْرِ فَأُنْسِيتُهَا فَالْتَمِسُوهَا فِي الْعَشْرِ الأَوَاخِرِ فِي الْوَتْرِ” (ޞަޙީހުލް ބުޚާރީއާއި މުސްލިމް މި ޙަދީޘް އައިސްފައިވެއެވެ.)
މާނައީ: ”ހަމަކަށަވަރުން ތިމަން ކަލޭގެފާނަށް ލައިލަތުލް ޤަދްރި ދެއްކެވުނެވެ. ދެން ތިމަންކަލޭގެފާނަށް އެރޭ ހަނދުމަފުޅުނެތި ކުރެއްވުނެވެ. ފަހެ، ތިޔަބައި މީހުން ފަހުދިހައިގެ އޮނަހިރި ރޭތަކުގައި އެރޭހޯދުމަށް މަސައްކަތް ކުރާށެވެ.”
އެ ދުވަހުގެ އިރުއަރައިގެން އަންނަ އިރު ދޯދި ނުހުންނާނެ އެވެ.
އުބައްޔު ބުނު ކަޢުބުގެ އަރިހުން ރިވާވެގެންވެއެވެ. އެކަލޭގެފާނު ވިދާޅުވިއެވެ. ރަސޫލުﷲ صلى الله عليه وسلم ތިމަންބޭކަލުންނަށް ޚަބަރު ދެއްވިއެވެ. “ أَنَّهَا لَيْلَةٌ صَبِيحَتُهَا تَطْلُعُ الشَّمْسُ لَيْسَ لَهَا شُعَاعٌ ” (ޞަޙީޙް މުސްލިމް) މާނައީ: “ހަމަކަށަވަރުން އެރޭގެ ހެނދުނުވުމުން އިރުއަރާއިރު އިރުއަރާނީ އިރުގައި ދޯދި ނުހުންނަ ޙާލުގައެވެ.”
ލައިލަތުލް ޤަދްރިގެ ޢަލާމާތްތަކާ ބެހޭގޮތުން ދެކެވޭ ޞައްޙަ ނޫން ވާހަކަތައް:
* އެރޭ ކުއްތާ އާއި ޙިމާރު ނުގޮވުން
* ކަނޑުގެ ލޮނުގަނޑު މީރުފެނަށް ބަދަލުވުން
* ގަސްތައް ވެއްޓި އޭގެ އަޞްލު ޖަގަހަތަކަށް ރުޖޫޢަވުން
* އެރެއަކީ އަލިވެގެންވާ ރެއެއްކަމުގައިވުން
* އެރޭ ހުރިހާ އެއްޗެއް ސަޖިދަ ޖެހުން
މަސްދަރު: އިލްމު.އެމްވީ