ފަހުގެ ތާރީޚުގައި އައްޑޫގައި ފޯރިގަދަ ފުޓްބޯޅަ މުބާރާތްތަކެއް ބޭއްވިފައި ވުމާއިއެކު ޒަމާނުއްސުރެ އައްޑޫގެ ރަށްތަކުގެ މެދުގައި އޮތް ފުޓްބޯޅައިގެ ވާދަވެރިކަން މިމަހުގެ 18 ވަނަ ދުވަހު ފަށާ "މިނިވަން50 ފުޓްބޯޅަ މުބާރާތް 2015" ގެ އައްޑޫ ސިޓީގެ ބުރުގައި ފެނިގެންދާނެއެވެ.
މި މުބާރާތުގައި ސ.ހިތަދޫ ތަމްސީލް ކުރާ ހިތަދޫ ފުޓްބޯޅަ ކްލަބްގެ ފަރާތުން އެޓީމުގެ ފަރިތަކުރުންތައް އެހެން ޓީމުތަކޭ އެއްފަދައިން ވަރަށް ފޯރީގައި ކުރިއަށް ގެންދާކަން ފާހަގަކޮށްލެވެއެވެ. އައްޑޫގެ ފުޓްބޯޅައިގެ ބޮޑު ބާރެއްގެ ގޮތުގައި އަބަދުވެސް ފާހަގަކުރެވިފައިވާ ހިތަދޫ އަކީ އެރަށަކަށް ރާއްޖޭގެ ނަން މަޝްހޫރު ގިނަ ތަރިންތަކެއް ނިސްބަތްވާ ރަށެކެވެ.
މިނިވަން50 ފުޓްބޯޅަ މުބާރާތުގައި ވާދަކުރާ ހިތަދޫ ފުޓްބޯޅަ ކްލަބްގެ އެންމެ މުހިއްމު ކުޅުންތެރިއެއްގެ ގޮތުގައި ފާހަގަކުރެވެނީ ރާއްޖޭގެ ޤައުމީ ފުޓްބޯޅަ ޓީމުގައި ވެސް ވިދާލި މިޑްފީލްޑަރ ޝަންވީލް ޤާސިމް (ބޮންޑާ) އެވެ. ޒުވާން ގިނަ ކުޅުންތެރިންތަކެއްގެ މައްޗަށް އެކުލެވޭ ހިތަދޫ ޓީމުގެ އެންމެ މުހިއްމު ކުޅުންތެރިއެއްގެ ގޮތުގައި ވެސް ފާހަގަކުރެވެނީ ބޮންޑާއެވެ.
މުބާރާތުގައި ވާދަކުރާ އެހެން ޓީމުތަކުގެ މައްޗަށް ހިތަދޫ ޓީމަށް އޮތް އެންމެ ބޮޑު އެޑްވާންޓޭޖަކީ، ރާއްޖޭގެ ޤައުމީ ފެންވަރުގައި ފާހަގަކޮށްލެވޭ މޮޅު ކުޅުންތެރިޔަކު ޓީމުގައި ލީޑަރެއްގެ ގޮތުގައި ހުރުން ކަމަށް ޓީމުގެ ހުރިހާ ކުޅުންތެރިން ވެސް ޤަބޫލުކުރެއެވެ.
ބޮންޑާގެ އިތުރުން ވެސް ރާއްޖޭގެ ފުރަތަމަ ޑިވިޝަންގައި ކުޅެފައިވާ އެހެން ކުޅުންތެރިން ވެސް ހިތަދޫ ޓީމުގައި ހިމެނޭކަން ފާހަގަކޮށްލެވެއެވެ. އޭގެ ތެރޭގައި ކްލަބް ވެލެންސިޔާއަށް ކުޅުނު ހުސައިން ހަބީބް (ހަބީ) އާއި ދިވެހިރާއްޖޭގެ 23 އަހަރުން ދަށުގެ ޤައުމީ ޓީމްގެ މުހިއްމު ކުޅުންތެެރިއެއް ކަމުގައިވާ ޝިއުސް ވެސް ހިމެނެއެވެ.
" އަޅުގަނޑުމެން ޓީމުގެ ފަރާތުން ހުރިހާ ސަޕޯޓަރުންގެ ފަރާތުން ވެސް އެދެނީ ޓީމަށް ތަރުޙީބު ދިނުމަށް ދަނޑަށް އައުން. ޓީމުގެ ހުރިހާ ކުޅުންތެރިން ވެސް މަސައްކަތް ކުރާނީ މި މުބާރާތް ކާމިޔާބުކުރުމަށް " ހަބީބް ބުންޏެވެ.
އައްޑޫ ސިޓީގައި ހިންގި ވައިޑީޕީ ޕްރޮގްރާމްގައި އެންމެ ފާހަގަކޮށްލެވުނު، އާލިފް (އާލިއްޕޭ)، ޓީމުގައި ހިމެނުކަމީ ވެސް އެޓީމް އިތުރަށް ވަރުގަދަ ވެގެން ގޮސްފައިވާ ކަމެކެވެ.
ގިނަ ދުވަސްތަކެއްގެ މެދުކެނޑުމަކަށް ފަހު އަލުން ފުޓްބޯޅަ ދަނޑަށް އެނބުރި އައިސް ކުރީގެ ކުޅުން އާލިފް ދައްކަމުން ދާއިރު، އެންމެ ފަހުން އައްޑޫގައި ބޭއްވި ފުޓްސެލް މުބާރާތްތަކުގައި ވެސް އޭނާ ވަނީ ހުނަރުވެރިކަން ވަރަށް ރަގަޅަށް ސާބިތުކޮށްދީފައެވެ.
އެހެން ކަމުން އާލިއްޕޭ އާއި އެކު ހިތަދޫ ޓީމުގެ ފޯވާޑްލައިން ހިފެހެއްޓުމަކީ އިދިކޮޅު ޓީމުތަކަށް އެހާ ފަސޭހަ ކަމަކަށް ވާނެ ކަމަކަށް ނުބެލެވެއެވެ.
ހިތަދޫ ޓީމުގައި ތިބި ކުޅުންތެރިންނަށް ބަލާއިރު މުޅިން ވެސް ހިމެނެނީ އައްޑޫގައި ބާއްވާ ތަފާތު ފުޓްބޯޅަ މުބާރާތްތަކުގައި ފާހަގަކޮށްލެވޭ މޮޅު ކުޅުންތެރިންނެވެ. އޭގެ ތެރޭގައި އަހްމަދް އިބްރާހިމް (ކޭޑީ) އާއި މުހައްމަދު މަމްނޫން (މަންނު) އަދި ޝަންގްރިއްލާގެ ޓީމުގައި މޮޅު ކުޅުމެއް ދައްކަމުން އަންނަ މުހައްމަދު ތިލްމީޒު (ބިއްޑޭ) ފާހަގަކޮށްލެވެއެވެ.
މުބާރާތުގައި ކުޅޭ އުމުރުން އެންމެ ހަގު ކުޅުންތެރިންގެ ތެރޭގައި ހިމެނޭ ރާއިފް އަކީ ވެސް ހިތަދޫ ފުޓްބޯޅަ ޓީމުން ފާހަގަކޮށްލެވޭ ކުޅުންތެރިއެކެވެ.
'އައްޑޫލައިވް' އާއި ވާހަކަ ދައްކަމުން ރާއިފް ބުނިގޮތުގައި، ޓީމްގެ ފަރިތަކުރުންތައް ކުރިއަށް ގެންދަނީ ވަރަށް ބަރާބަރަށް ކަމަށާއި ޓީމުގެ ހުރިހާ ކުޅުންތެރިންގެ އަޒުމަކީ ވެސް އައްޑޫ ސިޓީގެ ބުރުގެ ޗެމްޕިއަންކަން ހޯދުން ކަމަށެވެ.
ހިތަދޫގެ އެކި ސަރަހައްދުތަކަށް ނިސްބަތްވާ ތަފާތު އެކި ޚިޔާލުގެ ޒުވާނުންތަކެއް ގޮވައިގެން މަސައްކަތް ކުރުމަކީ، އުނދަގޫ ކަމެއް ކަމުގައި ބެލެވުނު ނަމަވެސް ޓީމުގެ މެނޭޖްމެންޓުން ދަނީ ވަރަށް ފުރިހަމައަށް އެކަން ކުރަމުންނެވެ.
ހިތަދޫ ފުޓްބޯޅަ ޓީމުގެ އެސިސްޓެންޓް މެނޭޖަރ މުހައްމަދް އަލްތާފް (އަލްޓީ) ބުނި ގޮތުގައި، ހިތަދޫ ފުޓްބޯޅަ ޓީމުގެ ތައްޔާރީތަކަށް ރަށުގެ ޒުވާނުންގެ ފަރާތުން ވަރަށް ބޮޑު އެހީތެރިކަމެއް ލިބެމުން އަންނަކަމަށެވެ.
" ޓީމުގައި ނުހިމެނޭ މިރަށުގެ ޒުވާނުންގެ ފަރާތުން ވަރަށް ބޮޑު އެއްބާރު ލުމެއް ލިބޭ. އަޅުގަނޑުމެންގެ ޓާގެޓަކީ މުބާރާތުގެ ތަށި. ހިތަދޫގެ އެންމެހާ ރައްޔިތުން ވެސް ޓީމަށް ސަޕޯޓް ކުރުމަށް ދަނޑަށް ވަޑައިގަތުން އަޅުގަނޑުމެންގެ އެދުމަކީ "، އަލްޓީ ބުންޏެވެ.
ހިތަދޫ ޓީމްގެ ކޯޗަކީ، ފޭދޫ އަށް ނިސްބަތްވާ މުހައްމަދް ސައީދް (ސަޑޭ) އެވެ. އައްޑޫ ސިޓީގައި މިވަގުތު ތިބި އެންމެ ތަޖުރިބާކާރު ކޯޗުންގެ ތެރޭގައި ހިމެނޭ ސަޑޭގެ އިރުޝާދު ލިބުމަކީ މުބާރާތް ކާމިޔާބު ކުރުމަށް ލިބޭނެ އިތުރު ހިތްވަރެކެވެ. އެހެން ނަމަވެސް މުބާރާތުގައި ވާދަކުރާ އަނެއް 3 ޓީމަކީ ވެސް ހުނަރުވެރި ކުޅުންތެރިންތަކެއް ތިިބި ޓީމުތަކަށް ވުމުން ހިތަދޫ ފުޓްބޯޅަ ކްލަބަށް ވެސް އެއީ ފަސޭހަ ކަމަކަށް ވާނެ ކަމަކަށް ނުބެލެވެއެވެ.