އުންދަކީ އިމިގްރޭޝަން ދާއިރާ އިން ރާއްޖޭގެ ސަލާމަތާއި ރައްކާތެރިކަން ދެމެހެއްޓުމުގައި އިތުރު ކުރިއެރުންތައް ލިބިގެން ދިއުން ކަމަށް އާ ކޮންޓްރޯލަ ޖެނެރަލް އޮފް އިމިގްރޭޝަން އަހުމަދު ފަސީހް ވިދާޅުވެއްޖެ އެވެ.
އިމިގްރޭޝަންގެ 75 ވަނަ އަހަރީ ދުވަހާ ގުޅިގެން އާންމު ކުރެއްވި މެސެޖެއްގައި ކުރީގެ ޕޮލިސް ކޮމިޝަނަރު ވަނީ އިމިގްރޭޝަންގެ އަލިމަސް ޔޫބީލް ފާހަގަކުރަމުން އަންނަ އިރު، އިމިގްރޭޝަނަށް ޚިދުމަތްކޮށްދެއްވި އަދި މިހާރު ވެސް ހީވާގިކަމާ އެކު ޚިދުމަތްކޮށް ދެއްވަމުން ގެންދަވާ އެންމެހައި މުވައްޒަފުންނަށް ޝުކުރާއި ތަހުނިޔާ ދަންނަވައި އެވެ.
ފަސީހި ވިދާޅުވީ އިމިގްރޭޝަންގެ 75 އަހަރުގެ ދިގު ތާރީޚުގައި، ޤައުމުގެ ދޮރާށިތައް ރައްކާތެރިކޮށް ބެލެހެއްޓުމުގައާއި، ރާއްޖޭގައި މަސައްކަތްކުރާ އުޅޭ ބިދޭސީންނަށް ބޭނުންވާ ގިނަ ޚިދުމަތްތަކެއް ޒަމާނުއްސުރެ ފޯރުކޮށް ދެމުން އަންނަކަން އުފަލާއެކު ފާހަގަކުރައްވާ ކަމަށެވެ.
"އަޅުގަނޑުގެ އުންމީދަކީ ކުރިއަށް އޮތް ތަނުގައިވެސް އިމިގްރޭޝަންގެ ޚިދުމަތްތައް އިތުރަށް ފުޅާވެ، ލައި ފަސޭހަ ޚިދުމަތްތަކެއް ފޯރުކޮށް ދެވި، ރާއްޖޭގެ ސަލާމަތާއި ރައްކާތެރިކަން ދެމެހެއްޓުމަށް ކުރަމުންދާ މަސައްކތުގައި އިތުރު ކުރިއެރުންތައް ލިބިގެން ދިއުން." އޭނަ ވިދާޅުވި އެވެ.
ފަސީހު އިމިގްރޭޝަންގެ ވެރިއަކަށް އައްޔަންކުރީ އެ މަގާމުގައި ކުރިން ހުންނެވި ޝަމާން ވަހީދުގެ މައްޗަށް ކުރެވޭ ތުހުމަތުތަކާ ގުޅިގެން މަގާމުން މިދިޔަ ހަފުތާގައި ވަކިކުުމަށް ފަހު އެވެ.