Last Updated: April 3, 13:57
Thursday, April 3, 2025
ޚަބަރު

ރައީސް ގެންދަވަނީ މައްސަލަތައް ހައްލުކޮށް ދެއްވަމުން

އިކޮނޮމިކް މިނިސްޓަރު މުހައްމަދު ސައީދު - ފޮޓޯ: އިކޮނޮމިކް މިނިސްޓްރީ

ރައީސް ޑރ. މުހައްމަދު މުއިއްޒު ގެންދަވަނީ މައްސަލަތައް ހައްލުކޮށްދެއްވަމުން ކަމަށް އިކޮނޮމިކް މިނިސްޓަރު މުހައްމަދު ސައީދު ވިދާޅުވެއްޖެ އެވެ.

ހއ. އުތީމުގައި އޭޓީއެމް ހުޅުވުމުގެ ރަސްމިއްޔާތުގައި ވާހަކަ ދައްކަވަމުން ސައީދު ވިދާޅުވީ މުޅި ރާއްޖެ އޮތީ ދަރަނީގެ ދަންތުރައެއްގައި ކަމަށާއި އޭރު ޤައުމު އޮތީ ދެންމެ ދެންމެ ދަރާ ވިކިދާނެ ހާލަތެއްގައި ކަމަށެވެ. ނަމަވެސް ރައީސް މުއިއްޒުގެ ލީޑަޝިޕްގައި ގެންދަވަނީ އެ މައްސަލަތައް ހައްލުކޮށްދެއްވަމުން ކަމަށް ސައީދު ވިދާޅުވި އެވެ.

"މާތްﷲގެ ތަނަވަސް ވާގިފުޅާ އެކު ރައީސް މުއިއްޒުގެ ލީޑާޝިޕްގައި މި ރާއްޖެ މި ކުރި ދަތުރުގައި، ކުރަމުން މި އަންނަ ދަތުރުގައި، އެ މައްސަލަތައް ހައްލު ކުރައްވަމުން، މިހާރު އެ މަނިކުފާނު އެ ގެންދަވަނީ ރައްޔިތުންނަށް ބޭނުންވާ މުހިއްމު ވަސީލަތްތައް ވަރަށް ބާރު ސްޕީޑުގައި ގެނެސްދެއްވަމުން،" ސައީދު ވިދާޅުވި އެވެ.

ސައީދު ވިދާޅުވީ މިހާ އަވަހަށް އޭޓީއެމް ބެހެއްޓިދާނެ ކަމަށް މީގެ ކުރިން ބަޔަކު ގަބޫލު ނުކުރާނެ ކަމަށާއި ނަމަވެސް ކުޑަ ރަށެއް ބޮޑު ރަށެއް އެއްވެސް ކަހަލަ ތަފާތުކަމެއް ނެތި އެ ހިދުމަތް ފޯރުކޮށްދެމުންދާ ކަމަށެވެ. އަދި މިއީ މިދިޔަ ކުޑަދުވަސްކޮޅެއްގެ ތެރޭގައި ލިބުނު ވަރަށް ބޮޑު އުފަލެއް ކަމަށްވެސް ވިދާޅުވި އެވެ.

ރާއްޖޭގެ މީހުން ދިރިއުޅޭ ހުރިހާ ރަށެއްގައި މިއަހަރު ނިމުމުގެ ކުރިން އޭޓީއެމްތައް ބެހެއްޓުމަށް ސަރުކާރުން ދަނީ މަސައްކަތް ކުރަމުންނެވެ.