މެޑިސިން ކިޔަވާ ދަރިވަރުންނަށް އިންޓާންޝިޕް ހެދުމަށް ހުރި ދަތިތަކަށް ބަންގްލަދޭޝް އިން ބޮޑު ހައްލެއް ލިބިފައިވާ ކަމަށް ހެލްތު މިނިސްޓްރީން ބުނެފި އެވެ.
އެ މިނިސްޓްރީން ބުނީ މީގެ ކުރިން ދިވެހި ދަރިވަރުން ބަންގްލަދޭޝް އިން އެމްބީބީ.އެސް އިންޓާންޝިޕް ފުރުޞަތު ލިބެނީ ހަމައެކަނި ޗިޓަގޮންގް މެޑިކަލް ކޮލެޖް ހޮސްޕިޓަލުން ނުވަތަ ޝޭރް-އޭ-ބަންގްލާ މެޑިކަލް ކޮލެޖް ހޮސްޕިޓަލުން ކަމަށެވެ.
ނަމަވެސް ހެލްތު މިނިސްޓްރީ އާއި ފޮރިން މިނިސްޓްރީ ގުޅިގެން، ބަންގްލަދޭޝްގައި އެމްބީބީއެސް އިންޓާންޝިޕް ފުރުޞަތުތައް ހޯދުމަށް ކުރެވުނު މަސައްކަތުގެ ނަތީޖާއެއްގެ ގޮތުން، އިތުރު ފަސް ކޮލެޖެއްގައި ދިވެހި ދަރިވަރުންނަށް އިންޓާންޝިޕް ފުރިހަމަކުރުމުގެ ފުރުޞަތު މިހާރު ލިބޭނެ އިންތިޒާމް ހަމަޖެހިފައިވެ އެވެ.
އޭގެ ތެރޭގައި ހިމެނޭ ތަންތަނަކީ:
* ސިލެޓު އެމްއޭޖީ އޮސްމާނީ މެޑިކަލް ކޮލެޖު
* މައިމެންސިންހު މެޑިކަލް ކޮލެޖު
* ރަޖްޝާނީ މެޑިކަލް ކޮލެޖު
* ޝަހީދު ޒިއައުރު ރަހުމާން މެޑިކަލް ކޮލެޖު، ބޮގުރާ
* ކޮކްސަސް ބާޒާރު މެޑިކަލް ކޮލެޖު
މި ފަސް ކޮލެޖަކީވެސް ބަންގްލަދޭޝް މެޑިކަލް އެންޑް ޑެންޓަލް ކައުންސިލް އަދި މޯލްޑިވްސް މެޑިކަލް އެންޑް ޑެންޓަލް ކައުންސިލުން ޤަބޫލު ކުރާ ކޮލެޖްތަކެކެވެ.
އެގޮތުން ބަންގްލަދޭޝް އިން އިންޓާޝިޕް ޕްލޭސްމަންޓް ހޯދަން ބޭނުންވާ ދަރިވަރުން މި މިނިސްޓްރީގެ އީމެއިލް training@health.gov.mv އަށް ރިކުއެސްޓް ފޮނުވުމަށް ހެލްތު މިނިސްޓްރީން އެދިފައިވެ އެވެ.
އިންޓާންޝިޕް ފުރުޞަތު ރާއްޖެއިން ވެސް އިތުރަށް ފުޅާ ކުރުމުގެ މަސައްކަތް ކުރިއަށްދާ ކަމަށާއި މި އަހަރު ސަރުކާރުގެ ހޮސްޕިޓަލްތަކުގައި އިންޓަޝިޕް ފެށުމަށް މިނިސްޓްރީން އަންނަނީ މަސައްއްކަތް ކުރަމުންނެވެ.