އީދު ލައިޓު ހަރުކުރަން އެންގުމުގެ ކުރިން އައްޑޫ ސިޓީގެ ކަރަންޓު މައްސަލަ ހައްލުކޮށްދިނުމަށް އައްޑޫ ސިޓީ ކައުންސިލްގެ ޑެޕިއުޓީ މޭޔަރު މުހައްމަދު ޝުއާއު ސަރުކާރަށް ގޮވާލައިފި އެވެ.
ރޯދަ މަހަށް އައްޑޫގެ ކަރަންޓު މައްސަލަ ހައްލުކޮށްދޭނެ ކަމަށް ފެނަކައިން ބުނި ނަމަވެސް ރޯދަ މަސް ނިމެންދާއިރު ވެސް ކަރަންޓުގެ މައްސަލަ އަށް ހައްލެއް ލިބިފައެއް ނުވެ އެވެ. އެގޮތުން އިއްޔެ އާއި މިއަދު ވެސް އައްޑޫގެ ގުޅިފައިވާ ރަށްތަކުން އެކި ވަގުތުތަކުގައި އެއް ގަޑިއިރަށް ކަރަންޓު ކަނޑާފައިވެ އެވެ.
މިކަމާ ގުޅިގެން ޝުއާއު ވިދާޅުވީ އައްޑޫގެ ގުޅިފައިވާ ރަށްތަކުގައި ކަރަންޓުގެ ޚިދުމަތް ކެނޑެމުންދާތާ މިހާރު އަހަރެއްހާ ދުވަސްވެފައިވާ ކަމަށާއި މިއީ އައްޑޫގެ ރައްޔިތުންނަށް ވަރަށް ބޮޑު ތަކުލީފަކާއި ކުރިމަތިވެފައިވާ މައްސަލައެއް ކަމަށެވެ. ސަރުކާރުން މި ރަމަޟާންމަހު ކަރަންޓު ނުކެނޑޭނެކަމުގެ ފޮނި އުންމީދުތަކެއް އައްޑޫގެ ރައްޔިތުންނަށް ދިން ނަމަވެސް މި ރަމަޟާންމަހު މުޅިންހެން މި ފެނުނީ އެހެން މަންޒަރެއް ކަމަށް ވިދާޅުވި އެވެ.
"ރަމަޟާންމަހުގެ ގިނަ ދުވަސްތަކެއްގައި ރައްޔިތުންނަށް މި ދަތިކަމުން އަރައިގަނެވިފައެއް ނުވޭ. ގޭތެރޭ ބޭނުންކުރާ އެތަކެއް ސަމާނުތަކަށް ގެއްލުންވެ، ނަމާދު ވަގުތުތަކުގައި ބަންގީގެ އަޑު ނީވި، ރޯދަ ވީއްލާ ވަގުތު ކަރަންޓު ނެތި، ރަމަޟާން މަސް މި ނިމެނީ،" ޝުއާއު ވިދާޅުވި އެވެ.
ފާއިތުވި އަހަރެއްހާ ދުވަހުގެ ތެރޭގައި އައްޑޫގެ ކަރަންޓުގެ މައްސަލައަށް އެކަށީގެންވާ ހައްލެއް ނުލިބި ދިއުމަކީ ރައްޔިތުންގެ ނުހަނު ކަންބޮޑުވުން ހުރި ކަމެއް ކަމަށާއި މި ބަރަކާތްތެރި ރަމަޟާން މަސް ނިމިގެންދާއިރު، ސަރުކާރުން ފިޠުރު ޢީދަށް ރަށް ދިއްލުމަށް އެންގުމަކީ އައްޑޫ ރައްޔިތުންނަށް ކުރާ ޖެއްސުމެއްތޯ ހިތަށް އަރާ ކަމަށްވެސް ޝުއާއު ވިދާޅުވި އެވެ.
"އަސާސީ ޚިދުމަތަކަށްވާ ކަރަންޓުގެ މައްސަލަ ހައްލުނުވެ އޮއްވާ ފިޠުރު ޢީދަށް ރަށް ދިއްލުމަށް ސަރުކާރުން އެންގުމަކީ ރައްޔިތުންނަށް ކުރާ ޖެއްސުމެއްތޯ؟ އައްޑޫގެ ކަރަންޓު މައްސަލަ ހައްލުކޮށް ގެތައް ދިއްލުމަށްފަހު ނޫނީ ޢީދު ލައިޓްސް ހަރުކުރުމަކީ ރައްޔިތުން ބޭނުންވާނެ ކަމެއް ނޫން،" އޭނާ ވިދާޅުވި އެވެ.
އައްޑޫގެ ކަރަންޓުގެ މައްސަލައާ ގުޅިގެން ފެނަކައިގެ އިސްވެރިން މަޖިލީހުގެ އެސްއޯއީ ކޮމިޓީއަށް ހާޒިރުކޮށްދޭން މީގެކުރިން ހިތަދޫ މެދު ދާއިރާގެ މެމްބަރު އަހުމަދު އަޒާން ވަނީ ހުށަހަޅައިފަ އެވެ. އެ މައްސަލައާ ގުޅިގެން ފެނަކައިގެ އިސްވެރިން ހާޒިރުކުރަން ފާސްކުރި ނަމަވެސް މިހާތަނަށް އެ ކުންފުނީގެ ވެރިން ކޮމިޓީއަށް ގެނެސްފައެއް ނުވެ އެވެ.
ފެނަކަ އިން ދާދިފަހުން އައްޑޫއަށް 1.8 މެގަވޮޓްގެ ދެ ޖަނަރޭޓަރެއް ގެނެސް އިންސްޓޯލްކޮށް ހިދުމަތްދޭން ވަނީ ފަށާފަ އެވެ. ނަމަވެސް ކަރަންޓު ކެނޑުމުގެ މައްސަލަ އަށް ހައްލެއް ނުލިބި ދިގުލައިގެންދާތީ އާންމުންގެ ކަންބޮޑުވުން ވަނީ އިންތިހާއަށް އިތުރުވެފަ އެވެ.