އައްޑޫ ސިޓީގެ ކަރަންޓުގެ މައްސަލަ ހައްލުނުވެ ދިގުލައިގެން ގޮސްފައިވާތީ ފެނަކައިގެ މެނޭޖިން ޑިރެކްޓަރު މޭޖާ (ރިޓަޔާޑް) މުހައްމަދު ނަޖާހް އިސްތިއުފާ ދެއްވަން ހިތަދޫ މެދު ދާއިރާގެ ޕީއެންސީ މެމްބަރު އަހުމަދު އަޒާން ގޮވާލައިފި އެވެ.
ރޯދަ މަހަށް އައްޑޫގެ ކަރަންޓު މައްސަލަ ހައްލުކޮށްދޭނެ ކަމަށް ފެނަކައިން ބުނި ނަމަވެސް ރޯދަ މަސް ނިމެންދާއިރު ވެސް ކަރަންޓުގެ މައްސަލަ އަށް ހައްލެއް ލިބިފައެއް ނުވެ އެވެ. އެގޮތުން އިއްޔެ އާއި މިއަދު ވެސް އައްޑޫގެ ގުޅިފައިވާ ރަށްތަކުން އެކި ވަގުތުތަކުގައި އެއް ގަޑިއިރަށް ކަރަންޓު ކަނޑާފައިވެ އެވެ.
އެކްސްގައި ކުރެއްވި ޕޯސްޓެއްގައި އަޒާން ވިދާޅުވީ ފާއިތުވި ހަ މަސްތެރޭ 175 ދުވަހުގެ ތެރެއިން 84 ދުވަހު އައްޑޫން ކަރަންޓުގެ ހިދުމަތް މެދުކެނޑިފައިވާ ކަމަށާއި އަދި މިދިޔަ މަހު އެކަނި ވެސް 75 ޕަސެންޓް ދުވަހު އެއް ގަޑިއިރަށް ވުރެ އިތުރަށް ކަރަންޓު ކަނޑާފައިވާ ކަމަށެވެ.
ކަރަންޓު ކެނޑުމާ ގުޅިގެން އާންމުންގެ ދިރިއުޅުމަށް ބުރޫ އަރައި އަގުބޮޑު ތަކެއްޗަށް ގެއްލުންތަކެއް ވަމުންދާއިރު އައްޑޫ ރައްޔިތުން އާދަޔާ ހިލާފަށް މިކަމުގައި ކެތްތެރިކަން ދައްކުވައިދީފައިވާ ކަމަށް އަޒާން ވިދާޅުވި އެވެ.
"ފެނަކައިގެ މެނޭޖިން ޑިރެކްޓަރު ވަނީ ވިދާޅުވެފައި ރޯދައިގެ ކުރިން މި މައްސަލައަށް ހައްލެއް ހޯދައި ނުދެވިއްޖެނަމަ އިސްތިއުފާ ދެއްވާނެ ކަމަށް. ވަގުތު ޖެހިއްޖެ، މަގާމުން އިސްތިއުފާ ދެއްވާ،" އަޒާން ވިދާޅުވި އެވެ.
Over the past 6 months, Addu City faced power outages on 84 out of 175 days. That's nearly one in every two days. In February 2025 alone, electricity was cut for over an hour on 75% of the days.
Despite the frequent outages disrupting daily life and damaging appliances worth… pic.twitter.com/kP2Wz9NlkK
— Ahmed Azaan (@axanner) March 24, 2025
އައްޑޫގެ ކަރަންޓުގެ މައްސަލައާ ގުޅިގެން ފެނަކައިގެ އިސްވެރިން މަޖިލީހުގެ އެސްއޯއީ ކޮމިޓީއަށް ހާޒިރުކޮށްދޭން މީގެކުރިން އަޒާން ވަނީ ހުށަހަޅައިފަ އެވެ. އެ މައްސަލައާ ގުޅިގެން ފެނަކައިގެ އިސްވެރިން ހާޒިރުކުރަން ފާސްކުރި ނަމަވެސް މިހާތަނަށް އެ ކުންފުނީގެ ވެރިން ކޮމިޓީއަށް ގެނެސްފައެއް ނުވެ އެވެ.