އައްޑޫގެ ގުޅިފައިވާ އަވަށްތަކަށް ކަރަންޓް ދެމުން އަންނަ މަރުކަޒީ އިންޖީނުގޭގެ ތިން އިންޖީނަކަށް މައްސަލަތަކެއް ދިމާވެ، މަރާމާތު ކުރަމުން އަންނަ ކަމަށް ފެނަކަ އިން ބުނެފި އެވެ.
އިިންޖީނުތަކަކަށް ދިމާވި މައްސަލަތަކަކާ ހެދި އާދީއްޔަ ދުވަހުން ފެށިގެން އައްޑޫގެ ގުޅިފައިވާ އަވަށްތަކުން ދަނީ އެކި ވަގުތަކުގައި ގަޑިއެެއްހާ އިރަށް ކަރަންޓް ކަނޑަމުންނެވެ. މިކަމާ ގުޅިގެން ފެނަކަ އިން އިއްޔެ ބުނީ ގުޅިފައިވާ އަވަށްތައް ކަމަށްވާ ހިތަދު އާއި މަރަދު އާއި މަރަދޫފޭދޫގެ އިތުރުން ފޭދޫން ކަރަންޓް ކަނޑަމުންދާނެތީ ކަރަންޓު ކަނޑާލަން ނިންމާ ސަރަހައްދުތަކުގެ މައުލޫމާތު ދުރާލައި އިއުލާނުކުރާނެ ކަމަށެވެ.
މަރުކަޒީ އިންޖީނު ގޭގައި ވިއްސަކަށް އިންޖީނު ހުރި އިރު، އައްޑު އަށް ބޭނުންވާ ވަރަށް ކަރަންޓެއް ނުއުފެއްދޭ އިރު، އެންނެ ބޮޑު މައްސަލަ އަކީ ލޯޑު ބޮޑުވުމެވެ.
އައްޑޫ ސެންޓްރަލް ޕަވަރ ސްޓޭޝަން ގެ 03 އިންޖީނެއް މަރާމާތުކުރުމުގެ މަސައްކަތް މިވަގުތުވެސް ދަނީ ކުރެވެމުން. pic.twitter.com/oMKkaX2Zof
— Fenaka Corporation Ltd (@TeamFenaka) March 24, 2025
އައްޑޫގެ ކަރަންޓް މައްސަލަ އަށް އެދެވޭ ހައްލެއް ނުލިބި ރައްޔިތުން ބޮޑު ތަކުލީފު އުފުލަން ޖެހިފައިވާ އިރު، ފެނަކަ އިން ދާދި ފަހިން އައްޑު ޖަނަރޭޓަރެއް ގެނެސް އިންސްޓޯލްކޮށް ހިދުމަތް ދޭން ފެށި ނަމަވެސް ކަރަންޓު ކެނޑުމުގެ މައްސަލަ އަށް ހައްލެއް ނުވެ އެވެ.
އައްޑޫގެ ކަރަންޓް މައްސަލަ އަށް ހައްލެއް ހޯދައި ނުދެވި ދިގުލައިގެންދާތީ ހިތަދޫ މެދު ދާއިރާގެ ޕީއެންސީ މެމްބަރު އަހުމަދު އަޒާން ވަނީ ފެނަކައިގެ މެނޭޖިން ޑިރެކްޓަރު މުހައްމަދު ނަޖާހު މަގާމުން އިސްތިއުފާ ދެއްވަން ވެސް ގޮވާލައިފި އެވެ. އައްޑޫގެ ކަރަންޓް މައްސަލާގައި ދާދި ފަހުން ކައުންސިލަރުންތަކެއް އިސްކޮށް ތިއްބަވައިގެން ހިތަދޫގައި މުޒާހަރާ ވެސް ކޮށްފައިވެ އެެވެ.
ފިތުރު އީދަށް ރާއްޖެ ކުލަބޮކިތަކުން ދިއްލަން ސަރުކާރުން ތައްޔާރީތައްވަމުން އަންނަ އިރު، އައްޑޫގެ ކަރަންޓް މައްސަލަ ހައްލުކޮށް ދިނުން މާ އައުލާކަން ބޮޑު ކަމަށް ގިނަ ބަޔަކު އަންނަނީ ބުނަމުންނެވެ.