އައްޑު އަށް 1.8 މެގަވޮޓްގެ އިތުރު ޖަނަރެޓަރެއް ފުރުވާލައިފި އެވެ.
ފެނަކަ އިން ބުނި ގޮތުގައި އެ ޖެންސެޓް ފުރުވައިލީ ރޭގެ ވަގުތެއްގަ އެވެ.
އައްޑޫގެ ގުޅިފައިވާ އަވަށްތަކުން ކަރަންޓް ކެނޑޭ މައްސަލަ ބޮޑުވެފައިވާތީ އެކަން ހައްލު ކުރަން ރޯދައިގެ ކުރިން ވެސް 1.8 މެގަވޮޓުގެ ޖެންސެޓެއްގެ އިތުރުން ރޯދަ މަހުގެ ތެރޭގައި 1،000 ކިލޯވޮޓުގެ ޖެންސެޓެއްގެ އިތުރުން 1،600 ކިލޯވޮޓުގެ ޖެންސެޓެއް ގެނެސްގެން އިންސްޓޯލްކޮށްފައިވެ އެވެ.
ނަމަވެސް ކަރަންޓް ކެނޑޭ މައްސަލަ އަށް އެދެވޭ ހައްލެއް ނުލިބި މިދިޔަ އާދީއްތަ ދުވަހުން ފެށިގެން އަނެއްކާ ވެސް ގުޅިފައިވާ އަވަށްތައް ކަމަށްވާ ހިތަދު އާއި މަރަދު އާއި މަރަދޫފޭދޫގެ އިތުރުން ފޭދޫން ދަނީ ކަރަންޓް ކަނޑަމުންނެވެ. ފެނަކަ އިން ބުނީ މިހާރު ކަރަންޓް ކަނޑަނީ ތިން އިންޖީނަކަށް ދިމާވި މައްސަލަތަކާ ހެދި ކަމަށެވެ.
އެހެންވެ އެ ތަކެތި މަރާމާތު ކުރުމުގެ މަސައްކަތް އަންނަނީ ކުރަމުންނެވެ.