ފިތުރު އީދަށް ރާއްޖެ ކުލަބޮކިތަކުން ދިއްލަން ހިންގާ ހަރަކާތް ވަރަށް ފުރިހަމަ ވާނެ ކަމަށް ލޯކަލް މިނިސްޓަރު އާދަމް ޝަރީފު ވިދާޅުވެއްޖެ އެވެ.
ރަށްތައް ދިއްލުމުގެ ތައްޔާރީތައް މިހާރު އެކި ހިސާބުތަކުގައި ކުރިއަށްދާ އިރު މިނިސްޓަރު ވިދާޅުވީ އީދު ދިއްލުމުގެ ޙަރަކާތަކީ ރައީސް ޑރ. މުޙައްމަދު މުޢިއްޒު މާލޭގެ މޭޔަރުކަމުގައި ހުންނެވި އިރު ފެއްޓެވި ޙަރަކާތެއް ކަމަށާއި، އަދި ކުލަބޮކިތަކާއި، ގިޑިގެތަކާއި، ﷲ އަކުބަރުގެ ނަޣުރާގެ އަޑުއިވޭހެން ކުރިއަށް ގެންދިޔަ މި ޙަރަކާތް ވެގެން ދިޔައީ މާލޭގެ ގިނަ ބަޔަކު ބަލައިގަތް މުހިންމު ޙަރަކާތަކަށް ކަމަށް ވިދާޅުވިއެވެ.
އޭނަ ވިދާޅުވީ އެ މަންޒަރު އޭރު ބަލަން ތިބި ރަށްރަށުގެ މީހުން ވެސް އެ ކަމަށް ރައީސްގެ އަރިހުން އެކަމަށް އެދެމުން ދިއުމހގެ ނަތީޖާއެއްގެ ގޮތުން މި ދިޔަ އަހަރު ދިއްލުން އަތޮޅުތަކަށް ފުޅާކުރެވި މާގެ އިތުރުން އަތޮޅުތަކުގެ މައި ރަށްރަށާއި، ސިޓީތައް ދިއްލުމުގެ ޙަރަކާތް ކުރިއަށް ގެންދެވުނު ކަމަށެވެ. ހަމަ އެގޮތަށް މި އަހަރު ވެސް އީދަށް ދިއްލުމުގެ ޙަރަކާތް، ރަށްތައް އިތުރުކޮށް ޖުމްލަ 65 ރަށެއްގައި ޢީދު ދިއްލުން ކުރިއަށް ދާނެ ކަމަށް މިނިސްޓަރު ވިދާޅުވި އެވެ.
އާދަމް ޝަރީފު ވިދާޅުވީ އަތޮޅުތެރޭގެ ތަފާތު ރަށްތަކުން މިހާރު ވެސް ޢީދު ލައިޓް ހޯދުމަށް ގުޅަމުން އަންނަ ކަމަށެވެ. އަދި ދިއްލުމުގެ ޙަރަކާތުގެ އިތުރުން 200 އެއްހާ ޕްރޮޖެކްޓް މިނިސްޓްރީ މި އަހަރުތެރޭ ކުރިއަށް ގެންދަން ނިންމައި، ބައެއް ޕްރޮޖެކްޓްތަކުގައި ހިމެނޭ ބައެއް ތަންތަނުގެ ބިންގާ އެޅި، ސިވިލް ވޯކް މަސައްކަތް ފެށުމަށް ކައުންސިލްތަކާ ގުޅިގެން މަސައްކަތްތަކެއް މިހާރުވެސް ކުރެވެމުން އަންނަ ކަމަށް ވިދާޅުވި އެވެ.
މިނިސްޓަރު ވިދާޅުވީ ރަމަޟާން މަހުގެ ފަހު 10 ގެ ބަންދު ތެރޭގައި ވެސް އޮފީސް ހުޅުވި، އެ ޕްރޮޖެކްތަކާ ގުޅޭ މަސައްކަތްތައް މިނިސްޓްރީގެ މުވައްޒަފުން ހުއްޓުމެއް ނެތި ކުރަމުން އަންނަ ކަމަށެވެ.
ރަށްރަށް ޢީދަށް ދިއްލުމުގެ މަސައްކަތް ކުރިއަށް ދަނީ ކައުންސިލްތަކާއި، ފެނަކަ އަދި ސްޓެލްކޯގެ މުވައްޒަފުންގެ ވަރަށް ބޮޑު އެހީތެރިކަމަކާ އެކީގަ އެވެ.
މި އަހަރު ޖުމްލަ 64 ރަށެއް ޢީދު އަލިން ދިއްލައިލެވޭނެ އެވެ.