އައްޑޫގެ ކަރަންޓް މައްސަލައާ ގުޅޭ ގޮތުން ފެނަކަ ކުންފުނީގެ ލޯގޯ އާއި ލެޓަހެޑް ކޮޕީކޮށް، ކުންފުނީގެ ނަމުގައި ސައްހަަ ނޫން ލިޔުން އުފައްދައި ދައުރު ކުރަމުންދާ ކަމަށް ފެނަކަ އިން ބުނެފި އެވެ.
އެ ކުންފުނިން މިއަދު ހަވީރު ނެރުނު ބަޔާނެއްގައި ބުނީ އައްޑޫގެ ގުޅިފައިވާ އަވަށްތައް ކަމަށްވާ ހިތަދު އާއި މަރަދު އާއި މަރަދޫފޭދޫގެ އިތުރުން ފޭދޫގެ ކަރަންޓަށް ދިމާވެފައިވާ މައްސަލަ ހައްލު ކުރަން މަސައްކަތް ކުރަމުން އަންނަ އިރު، ރައްޔިތުންނަށް ކަމުގެ ހަގީގަތް އޮޅުވާލައި ނުތަނަވަސްކަން އުފައްދައި، ކުންފުންޏާ މެދު ރައްޔިތުންގެ މެދުގައި ނުރަނގަޅު ތަސައްވުރެ އުފެއްދުމަށް ބަޔަކު މަސައްކަތް ކުރަމުންދާ ކަމަށެވެ.
އެގޮތުން ކުންފުނީގެ އިންޓާނަލް މެމޯއެއްކަން ދެއްކުމަށް ސައްހަ ނޫން ލިޔުން އުފައްދައި އާންމު ކުރަމުންދާކަން ފާހަގަކުރެވިފައިވާ ކަމަށް ފެނަކަ އިން ބުންޏެވެ.
އެހެންވެ އެކަން ކުށްވެރިކޮށް، އެފަދަ ކަންކަން ނުކުރުމަށް ނަސޭހަތްތެރިވާ ކަމަށް ފެނަކަ އިން ނެރުނު ބަޔާނުފައި ބުންޏެވެ.
ބަޔާނުގައި ބުނީ އައްޑޫގެ ގުޅިފައިވާ އަވަށްތަކަށް ކަރަންޓް ދޭ މަރުކަޒީ އިންޖީނުގެއިން ކަސްޓަމަރުންނާ ހިއްސާކުރަން ބޭނުންވާ މައުލޫމާތު ހިއްސާކުރާނީ ކުންފުނީގެ ހިތަދޫ ބްރާންޗާއި މަރަދޫފޭދޫ ބްރާންޗްގެ ކޮމިއުނިޓީ ވައިބާ ގްރޫޕްތައް މެދުވެރިކޮށް ކަމަށެވެ. އަދި އިތުރަށް ހިއްސާ ކުރަން ޖެހޭ މައުލޫމާތު ހިއްސާކުރާނީ ފެނަކައިގެ ރަސްމީ ސޯޝަލް މީޑިއާ އެކައުންޓްތައް މެދުވެރިކޮށް ކަމަށް ވެސް ފެނަކަ އިން ބުންޏެވެ.
އެ ކުންފުނިން ބުނީ ކަރަންޓްގެ މައްސަލަ ހައްލުކޮށް ދެމެހެއްޓެނިވި ހިދުމަތެއް ރައްޔިތުންނަށް ދޭނެކަމުގެ ޔަގީންކަން ވެސް ދޭ ކަމަށެވެ.
އައްޑޫން ކަރަންޓް ކެނޑޭ މައްސަލައިގައި ގިނަ ބަޔަކު އަންނަނީ ފެނަކަ އަށް ވަރަށް ބޮޑަށް ފާޑުކިޔަމުންނެވެ. ދާދި ފަހުން ފެނަކައާ ދެކޮޅަށް ހިތަދޫގައި މުޒާހަރާ ވެސް ކޮށްފައިވާ ސަރުކާރަށް ނިސްބަތްވާ އައްޑޫގެ މަޖިލިސް މެންބަރަކު ވަނީ ފެނަކައިގެ މެނޭޖިން ޑިރެކްޓަރު މުހައްމަދު ނަޖާހު މަގާމުން އިސްތިއުފާ ދެއްވަން ވެސް ގޮވާލައްވައިފަ އެވެ.