Last Updated: April 3, 06:32
Thursday, April 3, 2025
ޚަބަރު

ސަލްޓަން ޕާކް ވަގުތީ ގޮތުން ބަންދު ކުރަނީ

ފިތުރު އީދުގައި މާލޭގައި ބާއްވަން ހަމަޖެހިފައިވާ ހަރަކާތްތަކާ ގުޅިގެން މާދަމާ އިން ފެށިގެން ސަލްޓަން ޕާކް ބަންދު ކުރަން ނިންމައިފި އެވެ.

ހައުސިން މިނިސްޓްރީން ބުނީ ޕާކް ބަންދުވާނީ އީދު ދުވަހާ ހަމައަށް ކަމަށެވެ. އަދި އެގޮތަށް ނިންމީ ފިޠުރު ޢީދުގެ މުނާސަބަތުގައި ސަރުކާރުން އިންތިޒާމުކުރާ "ޢީދު ހަވީރު 1446" ގެ ތައްޔާރީތަކަށްޓަކައި ކަމަށް ވެސް މިނިސްޓްރީން ބުންޏެވެ.

އީދު ދުވަހު ސަލްޓާން ޕާކާއި ޖުމްހޫރީ މައިދާން ހިމެނޭހެން އާއިލީ ބޮޑު ހަވީރެއް ތަފާތު ގިނަ ހަރަކާތްތަކާ އެކު ބާއްވަން ވަނީ ނިންމައިފަ އެވެ. އެގޮތުން އީދު ދުވަހުގެ ހަވީރު 4:00-6:00 އަށް ހަރަކާތްތައް ކުރިއަށް ގެންދާނީ ސަލްޓަން ޕާކުން ފެށިގެން އިސްލާމީ މަރުކަޒާއި ޖުމްހޫރީ މައިދާނާއި ރަސްމީ ބޮޑު ފާލަމުގެ ސަރަހައްދު ހިމެނޭ ގޮތަށެވެ.

"އީދު ހަވީރު 1446" ކުރިއަށް ގެންދަން ނިންމާފައި ވަނީ ސިފައިންނާއި ފުލުހުން އަދި ސަރުކާރު ހިއްސާވާ ކުންފުނިތައް ގުޅިގެންނެވެ.

އެ ހަރަކާތުގެ ބޭނުމަކީ ފިތުރު އީދުގެ އުފަލުގައި އާއިލާތައް އެކުވެރި މާހައުލެއްގައި ބައްދަލުވެ އީދު ސަލާންކޮށް، ހިތްހަމަޖެހޭ މާހައުލެއްގައި ވަގުތު ހޭދަކޮށްލުން ކަމަށެވެ.