Last Updated: April 4, 17:40
Friday, April 4, 2025
ޚަބަރު

އިތުުރު 8 ރަށެއްގައި ޕޮލިސް ސްޓޭޝަން އަޅަން ހަވާލުކޮށްފި

އިތުުރު އަށް ރަށެއްގައި ފުލުހުންގެ މަރުކަޒު އެޅުމަށް ތިން ކުންފުންޏަކާއެކު އެއްބަސްވުމުގައި ސޮއިކޮށްފި އެވެ.

އެ މަސައްކަތް ހަވާލުކޮށްފައިވަނީ މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ)، ފެނަކަ ކޯޕަރޭޝަން އަދި ރޯޑް ޑިވެލޮޕްމެންޓް ކޯޕަރޭޝަން (އާރްޑީސީ)އަށެވެ.

ފުލުހުން މިއަދު ބުނީ އެއްބަސްވުމުގެ ދަށުން އެމްޓީސީސީން ހަ ރަށެއްގައި، ފެނަކައިން އެއް ރަށުގައި އަދި އާރްޑީސީން އެއް ރަށުގައި ޕޮލިސް ސްޓޭޝަން ހަދާނެ ކަމަށެވެ.

ކުރިން ސޮއިކޮށްފައިވާ އެއްބަސްވުމާ އެކު މި މަޝްރޫއުގެ ދަށުން އެމްޓީސީސީން 21 ރަށެއްގައި، އާރުޑީސީއިން 21 ރަށެއްގައި އަދި ފެނަކައިން 41 ރަށެއްގައި ތަރައްގީކުރުމަށް ހަމަޖެހިފައިވާ ޕޮލިސް ސްޓޭޝަންތަކާ އެކު ޖުމުލަ 83 ރަށެއްގައި ޕޮލިސް ސްޓޭޝަން ގާއިމުކުރެވިގެންދާނެ ކަމަށް ފުލުހުން ބުންޏެވެ.

އެ މަޝްރޫއުގެ ދަށުން ތަރައްގީކުރާ އިމާރާތްތަކުގެ ތެރޭގައި ފުލުހުންގެ ހިދުމަތް ސަރަހައްދީ ފެންވަރުގައި ފޯރުކޮށްދިނުމަށް ބޭނުންވާ އިމާރާތްތަކާއި އަތޮޅު ފެންވަރުގައި ފުލުހުންގެ ހިދުމަތް ފޯރުކޮށްދިނުމަށް ބޭނުންވާ އިމާރާތްތައް ހިމެނޭ ކަމަށް ފުލުހުން މައުލޫމާތުދެ އެވެ.

މީގެ އިތުރުން، ރަށްރަށުގައި ފުލުހުންގެ ހިދުމަތް އަލުން ފެށުމަށާއި ތަރައްގީކުރުމަށް ޕޮލިސް ސްޓޭޝަންތައް ގާއިމުކުރުމާއި ޕޮލިސް ޕޯސްޓުތަކާއި ފުލުހުންގެ އެކޮމޮޑޭޝަން ބްލޮކްތައް ތަރައްގީކުރުން ވެސް ހިމެނޭ ކަމަށް ފުލުހުން ބުންޏެވެ.