ތެލެސީމިއާ ސެންޓަރުގެ މަސައްކަތް ނިންމަން ސިފައިންނާ ހަވާލުކޮށްފައިވާތީ މާދަމާ އެ މަސައްކަތް ފަށާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވި އެވެ.
އެ މަނިކުފާނު މިއަދު ފެއްޓެވި "ރައްޔިތުންނާ އެކު" ޕޮޑްކާސްޓްގައި ވިދާޅުވީ އަމާޒަކީ އަންނަ މަސް ނިމުމުގެ ކުރިން މަސައްކަތް ނިންމައި ބޭނުން ކުރަން ފެށުން ކަމަށެވެ.
ރައީސް ވިދާޅުވީ ތެލަސީމިއާ ސެންޓަރުގެ ހާލަތު ބެއްލެވުމަށް ފަހު ކަންކަން ރަނގަޅުކުރުމަށް މިހާރު ފިޔަވަޅުތަކެއް އަޅާފައިވާ ކަމަށެވެ. އެގޮތުން މިހާރު ތެލަސީމިއާ ސެންޓަރު ހިންގާ އިމާރާތުގައި އެކި ކަންބޮޑުވުން ހުރިކަން ފާހަގަކުރައްވައި، އެ ސެންޓަރު ބަދަލުކުރުމަށް ކަނޑައަޅާފައިވާ "އޮރެންޖް ހިޔާ" އަށް ޒިޔާރަތްކުރައްވައި އެތަން ބައްލަވާލައްވާފައިވާ ކަމަށް ވިދާޅުވިއެވެ.
އަދި އެތަނުގެ މަސައްކަތުގެ، ބޮޑު ބައެއް އަދިވެސް ނުނިމޭތީއާ އެކީ މަސައްކަތް ހަވާލުކޮށްފައިވާ ކުންފުނީގެ ކޮންޓްރެކްޓްވެސް ހަމަވާތީ މިމަ ހުގެ 28 ވަނަ ދުވަހުން ފެށިގެން، އެތަން ނިންމުމުގެ މަސައްކަތް، ޤައުމީ ކަމެއްގެ ގޮތުގައި ކުރިއަށްގެންދިއުމަށް ސިފައިންނާ ހަވާލު ކުރައްވާފައިވާ ކަމަށް ރައީސް ވިދާޅުވި އެވެ.
ތެލަސީމިއާ ސެންޓަރަށް ވަޞީލަތްތައް ހަމަކުރުމަށް ނިންމަވައި، އެކަމަށް މަސައްކަތްތަކެއް ކުރައްވަމުން ގެންދަވާކަން ރައީސް ވިދާޅުވި އެވެ. މިގޮތުން ޓެސްޓް ކުރުމަށް ބޭނުންވާ ވަޞީލަތްތައް ހަމަކުރުމާއި، އެކަމަށް ބޭނުންވާ ބަޖެޓުގެ ކަންކަން ހަމަޖެއްސުން ހިމެނޭކަމުގައި ވިދާޅުވިއެވެ. އަދި ފިލްޓަރުގެ މައްސަލަ އާއި ދެން ވެސް ބެލެނިވެރިން ފާހަގަކުރެއްވި މައްސަލަތައް ވަރަށް ގާތުން ބައްލަވައި، އެކަންކަން ޙައްލުކޮށް ދެއްވުމަށް މަސައްކަތް ކުރައްވާނެ ކަމަށް ރައީސް ވިދާޅުވި އެވެ.