ދިވެހި ފުލުހުންގެ ޚިދުމަތަށް 92 އަހަރު ފުރުމާ ގުޅިގެން މާލެ އާއި އަތޮޅުތަކުގައި ދިދަ ނެގުމުގެ ޚާއްސަ ރަސްމިއްޔާތެއް ބާއްވައިފި އެވެ.
އެ ރަސްމިއްޔާތު ކުރިއަށް ގެންދިޔައީ ރޭ ދަންވަރު 12:00 ގަ އެވެ.
މާލޭގައި ދިދި ނެގުމުގެ ރަސްމިއްޔާތު ބޭއްވީ ފުލުހުންގެ މައި މަރުކަޒު ޝަހީދު ޙުސައިން އާދަމް ބިލްޑިންގުގަ އެވެ. އެ ރަސްމިއްޔާތު ޝަރަފުވެރިކޮށް ދެއްވީ ހޯމްލޭންޑް މިނިސްޓަރު ޢަލީ އިޙްސާނެވެ. ރަސްމިއްޔާތުގައި ޕޮލިސް ކޮމިޝަނަރު ޢަލީ ޝުޖާޢު، ޑެޕިއުޓީ ކޮމިޝަނަރުން ކަމަށްވާ ފަރްހާދު ފިކުރީ އާއި އިސްމާޢީލް ނަވީން ވެސް ބައިވެރިވެވަޑައިގެންނެވިއެވެ.
މީގެ އިތުރުން ފުލުހުންގެ އެކްޒެކެޓިވް އޮފިސަރުންނާއި ކޮމިޝަންޑް އޮފިސަރުންނާއި ގިނަ އަދަދެއްގެ ފުލުހުންނާއި އާންމު މުވައްޒަފުން ވެސް ބައިވެރިވި އެވެ.
ކީރިތި ޤުރުއާނުގެ ބަރަކާތުން ފެށުނު މި ރަސްމިއްޔާތުގައި ދިދަ ނެގުމަށްފަހު، ފުލުހުންގެ އަޒުމް ކިޔުމާއި ދުވަހާ ގުޅިގެން ހާއްސަ ދުއާއެއް ކިޔުން އޮތެެވެ. ފުލުހުންގެ ޢަޒުމް އިސްވެ ވިދާޅުވެދެއްވީ ޗީފް ސުޕްރިންޓެންޑް އޮފް ޕޮލިސް ޙަސަން ސަޢީދެެވެ. އަދި ދުއާ އިސްވެ ވިދާޅުވެދެއްވީ ޗީފް އިންސްޕެކްޓަ އޮފް ޕޮލިސް އަޙްމަދު ނަޡީފެެވެ.
ފުލުހުންގެ 92 ވަނަ އަހަރީ ދުވަހާ ގުޅިގެން މާލޭގައި ބޭއްވި ދިދަ ނެގުމުގެ ރަސްމިއްޔާތުގެ އިތުރުން ރާއްޖޭގައި ފުލުހުންގެ ޚިދުމަތް ގާއިމުކޮށްފައިވާ ޕޮލިސް ސްޓޭޝަންތަކުގައިވެ ސް ދިދަ ނެގުމުގެ ރަސްމިއްޔާތު ބޭއްވި އެވެ. އެ ރަށްރަށުގައި ބޭއްވި ރަސްމިއްޔާތުތަކުގައި ސަރުކާރު މުއައްސަސާތަކުގެ އިސްވެރިންނާއި މުވައްޒަފުންނާއި ޕޮލިސް ސްޓޭޝަންތަކުގެ މުވައްޒަފުން ބައިވެރިވި އެވެ.
ފުލުހުންގެ ޚިދުމަތުގެ އޮފިސަރުންނަކީ ނަޒާހަތްތެރިކަމާއި، ހިތްވަރާއި އަދި ޒިންމާދާރުކަމުގެ އަސާސްތައް ދަމަހައްޓައި، މުޖުތަމައުތަކުގެ ސަލާމަތާއި ރައްކާތެރިކަން ކަށަވަރު ކުރުމަށް ކެނޑިނޭޅި މަސައްކަތް ކުރަމުން އަންނަ އޮފިސަރުންނެވެ.
ރާއްޖޭގައި ފުރަތަމަ ފަހަރަށް ފުލުހުންގެ ހިދުމަތެއް އުފެދިގެންދި ޔައީ 1933 ގައި ރާއްޖޭގައި އޭރު ހުންނެވި ރަސްކަލުން ސުލްތާން މުހައްމަދު ޝަމްސުއްދީން ތިން ވަނަ، ރާއްޖޭގެ ފުރަތަމަ ގާނޫނު އަސާސީ ތަސްދީގުކުރެއްވުމާ ގުޅިގެންނެވެ.