އައްޑޫން ކަރަންޓް ކެނޑޭ މައްސަލަ ހައްލު ކުރުމަށްޓައި އެންމެ ފަހުން ގެނައި 1.8 މެގަވޮޓްގެ އާ އިންޖީނު މާދަމާ ޓެސްޓް ކުރަން ފެށޭނެ ކަމަށް ފެނަކައިން ބުނެފި އެވެ.
އެ ކުންފުނިން މިއަދު ބުނީ އައްޑޫގެ ގުޅިފައިވާ އަވަށްތަކަށް ކަރަންޓްދޭ މަރުކަޒީ އިންޖީނުގޭގެ ކެޕޭސިޓީ ވެސް އިތުރު ކުރަން ގެނައި އިންޖީނު އިންސްޓޯލްކުރުމުގެ މަސައްކަތުގެ ތެރެއިން އޭގެ ބޭނުން ކުރަން ޓެކްނިކަލް ޓީމުން އަންނަނީ މެދުނުކެނޑި، ދަންފަޅި ބަހައިގެން ރެއާއި ދުވާލު މަސައްކަތް ކުރަމުން ކަމަށެވެ.
"[އެހެންވެ] އިންސްޓޮލޭޝަން މަސައްކަތް ނިމި، ޓެސްޓް ރަން ކުރެވޭނެ ކަމަށް ލަފާ ކުރެވެނީ މާދަމާ ހެނދުނު." ފެނަކަ އިން ބުންޏެވެ.
ކަރަންޓުގެ މައްސަލަ ޙައްލުކުރުމަށް ކުންފުނިން ކެނޑިނޭޅި ކުރަމުން އަންނަ އިރު އައްޑޫ ރައްޔިތުން ފަރާތުން ލިބޭ އެއްބާރުލުމަށް ޝުކުރު އަދާކުރާ ކަމަށް ވެސް އެ ކުންފުނިން ބުންޏެވެ.
އައްޑޫގެ ގުޅިިފައިވާ އަވަށްތައް ކަމަށްވާ ހިތަދު އާއި މަރަދު އާއި މަރަދޫފޭދޫގެ އިތުރުން ފޭދޫން ކަރަންޓް ކެނޑޭ މައްސަލަ މި ރޯދައިގެ ކުރިން ހައްލު ކުރަން ފެނަކަ އިން އިންޖީނުތަކެއް ގެނެސް ބޭނުން ކުރަން ފެށި ނަމަވެސް، ލޯޑު ބޮޑުވުމުގެ މައްސަލަ އަށް ހައްލެއް ނުލިބެ އެވެ.
ނަމަވެސް އެންމެ ފަހުން ގެނެސް މިހާރު ޓެސްޓް ކުރަން ތައްޔާރުވަމުން އަންނަ އިންޖީނާ އެކު އެ މައްސަލަ ވަރަށް ބޮޑު ހައްލެއް އަންނާނެ ކަމަށް ފެނަކަ އިން ބުނެ އެވެ.