Last Updated: April 3, 06:32
Thursday, April 3, 2025
ޚަބަރު

ހިއްޗަށް ވަޑައިގަތުން ގެނެސްދިނީ ގޯސްކޮށް!

ފިތުރު އީދާ ގުޅުވައިގެން ބަހާ ބެހޭ މިނިސްޓްރީން ރޭ މާލޭގެ މަގުމަތީގައި ބޭއްވި "ހިއްޗަށް ވަޑައިގަތުމުގެ ދަރުބާރު" ތަމްސީލު ގެެނެސްދިނީ އޭގެ އަސްލު ގެއްލޭ ގޮތަށް ކަމަށް ވިދާޅުވެ، ރާއްޖޭގެ ތާރީހާ ބެހޭ ތަޖުރިބާރާކާރެއް ކަމަށްވާ ނާޖިހު ދީދީ އެ ހަރަކާތަށް ފާޑު ވިދާޅުވެއްޖެ އެވެ.

ރޭގެ އެ ހަރަކާތަކާ ގުޅޭ ގޮތުން ބަހާ ބެހޭ މިނިސްޓަރު އާދަމް ނަސީރު އިބްރާހީމް ވިދާޅުވީ ހިއްޗަށް ވަޑައިގަތުމަކީ ރާއްޖޭގައި އުވިފައިވާ ތަރިކައެއް ކަމަށާއި، ރާއްޖޭގެ ތާރީޚު ޒުވާނުންނަށް ކިޔައިދިނުމުގެ ވިސްނުން ރައީސް ގެންގުޅުއްވާތީ، މި ތަމްސީލް އިންތިޒާމު ކުރީ ކަމަށެވެ. އަދި އެއީއއާންމު ގޮތެއްގައި ރަދުން ބައިވެރިވެވަޑައިގެން ވަރަށް ކުލަގަދަކޮށް ބާއްވާ ހަރަކާތެއްކަން ވެސް މިނިސްޓަރު ފާހަގަ ކުރެއްވި އެވެ.

އެ ހަރަކާތާ ގުޅޭ ގޮތުން ނާޖިހު ސޯޝަލް މީޑިއާ ޕޯސްޓެއްގައި ވިދާޅުވީ ރާއްޖޭގެ ތާރީޚާއި ސަގާފަތުގައި ހިމެނޭ އެންމެ މުހިންމު އާދަކާދަތަކުގެ ތެރެއިން އެއް އާދަކާދައަކީ ހިއްޗަށް ވަޑައިގަތުމުގެ ރަސްމިއްޔާތު ކަމަށެވެ. އަދި އެ ރަސްމިއްޔާތަކީ ދިވެހި ރަސްރަސްކަލުން ރޯދަ މަހުގެ ތެރޭގައި ބާއްވަވާފައިވާ ނުހަނު ހައިބަވަންތަ، އޭގައި އެތައް ކަމެއް އެކުލެވިގެންވާ ވަރަށް ވެސް ފުރިހަމަ، ރީތި ރަސްމިއްޔާތއް ކަމަށާއި އެއީ ގިނަ ބައެއްގެ ބައެއްގެ މުނިފޫހިފިލުވައި ދިން ރަސްމިއްޔާތެއް ކަމަށް ވެސް ވިދާޅުވޮ އެވެ.

ނަމަވެސް ބަހާ މިނިސްޓްރީން ރޭދެއްކި ހިއްޗަށް ވަޑައިގަތުމުގެ ތަމްސީލަކީ އެ މުހިންމު އާދަކާދައިގެ އަސްލު މަގުޞަދާއި ރޫޙު ގެއްލިފައިވާ ތަމްސީލެއް ކަމަށް ނާޖިހު ވިދާޅުވި އެވެ.

އޭނަ ވިދާޅުވީ މި އީދުގައި ހިއްޗަށް ވަޑައިގަތުން ދައްކާނެ ވާހަކަ މިނިސްޓްރީން ބުނެފައިވާތީ، އެންމެ އުންމީދު ކުރީ އެ ތަމްސީލަކީ ވަރަށް ފުރިހަމައަށް ދިރާސާކޮށް ތައްޔާރުކޮށްފައިވާ، އަދި ދިވެހީންގެ ތާރީޚީ އަދި ސަގާފީ މި މުހިއްމު ތަރިކަ ރަނގަޅަށް ދައްކައިދޭނެ ތަމްސީލަކަށް ވާނެ ކަމަށެވެ.

ނަމަވެސް، ފެނިގެން ދިޔައީ އުންމީދު ކުރި ފަދަ މަންޒަރެއް ނޫން ކަމަށް ވިދާޅުވި އެވެ.

"ފެނިގެން ދިޔަ ތަމްސީލުން ހިއްޗަށް ވަޑައިގަތުމުގެ ރީތިކަމާއި އޭގެ ހައިބަވަންތަކަން އެއްގޮތަކަށްވެ ސް ނުދެއްކުނު. ރަސްމިއްޔާތު މުޅީން ފުރިހަމަ ވެސް ނުކުރެވޭ،" އޭނަ ވިދާޅުވި އެވެ. "އެންމެ ފުރަތަމަ ފާހަގަކުރެވުނު ކަމަކީ މިފަދަ މުހިންމު ރަސްމިއްޔާތެއް އޭގެ އަސްލާ އެއްގޮތަށް ދެއްކުމަށްޓަކައި ބޭނުންވާ ވަރަށް މީހުން ބައިވެރިކޮށްފައި ނުވާކަން. އޭގެ ސަބަބުން މުޅި ރަސްމިއްޔާތުގެ ހައިބަވަންތަކަން ގެއްލިފައިވޭ."

މީގެ އިތުރިން ބައިވެރިން އަޅައިގެން ތިބި ހެދުންތައް ވެސް އޭގެ އަސްލާ އެއްގޮތެއް ނޫން ކަމަށާއި ހިއްޗަށް ވަޑައިގަތުމުގެ ރަސްމިއްޔާތުގައި ބައިވެރިން އަޅަން ޖެހޭ ޚާއްޞަ ހެދުންތަކެއް ހުންނަ ކަމަށް ނާޖިހު ވިދާޅުވި އެވެ. އަދި އެ ހެދުންތައް އަޅަން ޖެހޭ ޚާއްޞަ ގޮތްތަކެއް ވެސް ހުންނަ ކަމަށް ވިދާޅުވި އެވެ.

ނަމަވެސް ރޭގެ ތަމްސީލުން ކިތަންމެ ގޯސްތަކެއް ފެނުނު ކަމަށް ވިދާޅުވި އެވެ.

"އަދި ހިތާމައާއެކު ފާހަގަ ކުރަން ޖެހެނީ، ބައެއް އީދުތަކުގައި ބައެއް ރަށްރަށުގައި ދައްކާ ހިއްޗަށް ވަޑައިގަތުމުގެ ތަމްސީލަށް ވުރެ ވެސް މިރޭ ފެނިގެން ދިޔަ ތަމްސީލުގެ ފެންވަރު ދަށްކަން." ނާޖިހު ވިދާޅުވި އެވެ. "މިއީ ވަރަށް ބޮޑު ކަންބޮޑުވުމެއް. ސަބަބަކީ ދިވެހިބަހާއި ސަގާފަތާއި ތަރިކައިގެ ވުޒާރާއަކީ މިފަދަ ކަންކަން ރައްކާތެރިކޮށް، ދަމަހައްޓައި، ކުރިއަރުވަން މަސައްކަތްކުރާ އިދާރާ ކަމަށްވާތީ."

އޭނަ ވިދާޅުވީ އުންމީދަކީ ކުރިމަގުގައި އެކަންކަމަށް ވިސްނައިގެން މިފަދަ ކަންކަން ކުރާނެ ކަމަށެވެ.