އިމާމުން ފިޤުހުވެރިވާން ޖެހޭނެ ކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވެއްޖެ އެވެ.
ހުޅުމާލޭގެ މިސްކިތެއްގައި އިއްޔެގެ ފިތުރު ނަމާދު ކުރަން ހަވާލުކުރި އިމާމާއި ބަދަލު އިމާމު ވެސް ހާޒިރުނުވި މައްސަލައިގައި އެ މީހުންނަށް މިނިސްޓްރީން އިއްޔެ ފިޔަވަޅު ވެސް އަޅާފައި ވަމިކޮށް މިނިސްޓަރު މިއަދު ސޯޝަލް މީޑިއާ ޕޯސްޓެއްގައި ވިދާޅުވީ ފިޤުހުވެރިވުމަކީ ޝަރުޢުގެ ޙުކުމްތައް އެ ވަގުތެއްގެ ޙާލަތުގައި ކަން އޮތް ގޮތުގެ މައްޗަށް ފައްތައި ޢަމަލުކުރުމަށް ދަނެގަތުން ކަމަށެެވެ.
އެގޮތުން މިސްކިތްތަކުގެ އިމާމުން ފިޤުހުވެރިވުމަކީ ވަރަށް މުހިންމު ކަމެއް ކަމަށާއި ފިޤުހުވެރިވުމަކަށް ކޮންމެހެން މާ މަތީ ޑިގްރީއެއް އޮތުން ލާޒިމެއް ނޫން ކަމަށް ވެސް ވިދާޅުވި އެވެ. އަފި އެ މީހުން އަޙްކާމްތަށް ތަޠްބީޤު ކުރުމަށް ދެނެގަތުން ފުދޭ ކަމަށް ވެސް މިނިސްޓަރު ވިދާޅުވި އެވެ.
މިސާލަކަށް 7.00 ޖަހާ އިރު ޢީދު ނަމާދު ފަށާ އިރު، 7.00 ތެދުވެ ވަގުތުން ހަށަން ބަނުމުގެ ބަދަލުގައި 7.00 ކުރިން ތެދުވެ 7.00 ވާއިރަށް ބޮޑުވެގެންވާ އެ ޖަމާއަތުގެ ސަފުތައް ތަރުތީބުކޮށްލެވޭނެހައި ވަގުތު އޮތްވައި ތެދުވެ ސަފު ތަރުތީބު ކުރުމަށް ޖާގަ ދެވޭނެ ކަމަށް ވިދާޅުވި އެވެ.
"ހަމަ މި މަގުން ފަރުޟު ނަމާދު ކުރާ ނަމަ، ޖަމާއަތް ބޮޑުވި ވަރަކަށް ކިޔެވުން ކުރު ކުރުމާއި، ޖަމާޢަތުގައި ނަމާދު ކުރަމުން ދަނިކޮށް ކުޑަކުދިން ރޯ އަޑު އިވިއްޖެ ނަމަ ނަމާދު އަވަސް ކުރުމާއި، މިސްކިތް ކައިރީގައި އެހެނިހެން މިސްކިތްތަކާއި މީހުން ދިރިއުޅޭ ގޭގޭ ހުރި ނަމަ ތާޅަ ފިއްޔަށް ނަމާދު ކުރާ އަޑު ނުޖެއްސުމާއި އެއީ ކައިރި ކައިރީގައި ހުންނަ މިސްކިތްތަކަށް އުނދަގޫވެދާނެތީ އާއި ކައިރި ގޭގޭގައި ނަމާދުކުރަން ތިބޭ އަންހެނުންނާއި ބަލިމީހުންނާއި ނިދާފައި ތިބޭ ކުޑަކުދިންނަށް ދަތިވެދާނެތީ،" ޝަހީމު ވިދާޅުވި އެވެ. "އަދި އެއް ބަޔަކު އަނެއް ބަޔަކަށް ޤުރުއާން ކިޔެވުމުގެ އަޑު އުފުލައި އުނދަގޫވާ ގޮތް ހެދުމަކީ ހަދީސްގައި ނަހީކުރެވިގެންވާ ކަމަކަށްވާތީ."
ނަމަވެސް އެ ޙާލަތުގައި ވެސް ބަންގި ގޮވާ އިރު ތާޅަ ފިއްޔަށް އަޑު ދޭން ޖެހޭނެ ކަމަށާއި އެއީ ނަމާދު ވަގުތު ވަދެއްޖެކަން ގިނަ ބަޔަކަށް އިޢުލާން ކުރުމުގެ ގޮތުން ކަމަށް ވިދާޅުވި އެވެ.
"ހަމަ މިގޮތަށް ދަމު ނަމާދުގައްޔާއި ޖަމާޢަތުގައި ނަމާދުކުރާއިރު ރުކޫޢާއި ސުޖޫދު ކުރުމުގައި އެހާ ގިނަ އިރު އެގޮތައް ނުތިބެވޭ ބަލި މީހުންނާއި އުޒުރުވެރިން ޖަމާޢަތުގައި ތިބޭނެ ކަމަށް ވިސްނުމާއި ގަދަ އަތްވާއި ނުވަތަ ވިއްސާރަ ވެހޭ ވަގުތު ޖަމާޢަތް ކުރުކުރުމާއި، ޢާއްމު ޙާލަތުގައި ހިތްހަމަޖެހޭ މިނެއްގައި އެންމެނަށް ވެސް ފަސޭހަވާނެ ގޮތަށް މެދުމިންކަމާއެކު ނަމާދުގެ ޖަމާޢަތް ގެންދިއުމާއި ނަމާދުގައި ޚުޝޫޢަތްތެރިވެ ނަމާދު ކުރުމާއި މި ހުރިހައި ކަމަކީ ވެސް ފިޤުހުވެރިވުމުގެ ތެރެއިންވާ ކަންކަން."