މިދިޔަ ރޯދަ މަހު އައްޑޫ ސިޓީގެ ކަރަންޓް ބިލުތަކުން 50 ޕަސެންޓްގެ ޑިސްކައުންޓެއް ދިނުމަށް އައްޑޫ ކައުންސިލްގެ ޑެޕިއުޓީ މޭޔަރު މުހައްމަދު ޝުއާއު ސަރުކާރަށް ގޮވާލައިފި އެވެ.
ރޯދަ މަހަށް އައްޑޫގެ ކަރަންޓު މައްސަލަ ހައްލުކޮށްދޭނެ ކަމަށް ފެނަކައިން ބުނި ނަމަވެސް ރޯދަ މަސް ތެރޭގައި ވެސް ކަރަންޓުގެ މައްސަލަ އަށް ހައްލުވެފައެއް ނުވެ އެވެ. އެގޮތުން މުޅި ރޯދަ މަހު ކޮންމެ ދުވަހަކުހެން ގޮތަކަށް އައްޑޫގެ ގުޅިފައިވާ ރަށްތަކުން އެކި ވަގުތުތަކުގައި އެއް ގަޑިއިރަށް ކަރަންޓު ކަނޑާފައިވެ އެވެ.
ފެނަކައިން މީގެކުރިން ވެސް މިގޮތަށް ކަރަންޓު ކެނޑުމުގެ މައްސަލަ ދިމާވުމުން ބައެއް ރަށްތަކުގެ ކަރަންޓު ބިލަށް ޑިސްކައުންޓް ދީފައިވެ އެވެ. އެގޮތުން މިދިޔަ އަހަރުގެ ރޯދަ މަހު ކަރަންޓު ކެނޑުމުގެ މައްސަލަ ދިމާވުމުން ހދ. ކުޅުދުއްފުށި ސިޓީގެ ރައްޔިތުންނަށް އެ މަހުގެ ކަރަންޓު ބިލުތަކުން 50 ޕަސެންޓުގެ ޑިސްކައުންޓެއް ފެނަކައިން ދީފައިވެ އެވެ.
އެކަމާ ގުޅިގެން ޝުއާއު ވިދާޅުވީ މިއަށްވުރެ މާ ގިނަ ދުވަހު، މާ ބޮޑެތި ދަތިތަކެއް ތަހައްމަލުކުރަމުންދާ އައްޑޫގެ ރައްޔިތުންނަށް މިފަދަ ލުޔެއް ދިނުމުގެ އެއްވެސް އިޝާރާތެއް ސަރުކާރުން އަދި ފެނަކަ ކޯޕަރޭޝަނުން ވެސް މިއަދާ ހަމައަށް ދައްކާފައި ނުވާ ކަމަށެވެ.
އެގޮތުން ކުޅުދުއްފުށީގެ ރައްޔިތުންނަށް ކަރަންޓު ބިލުން ޑިސްކައުންޓް ދިން އުސޫލުން، އައްޑޫގެ ރައްޔިތުންނަށްވެސް ހަމަހަމަކޮށް، ރޯދަ މަހުގެ ކަރަންޓު ބިލުން 50 ޕަސެންޓުގެ ޑިސްކައުންޓެއް ދިނުމަށް ރައީސް ޑރ. މުހައްމަދު މުއިއްޒަށް ޝުއާއު ވަނީ ގޮވާލާފަ އެވެ.
"މިއީ އިންސާފުވެރި، ހަމަހަމަ ގޮތް ކަމަށް ދެކެން،" އޭނާ ވިދާޅުވި އެވެ.
އައްޑޫގެ ގުޅިިފައިވާ ރަށްތައް ކަމަށްވާ ހިތަދު އާއި މަރަދު އާއި މަރަދޫފޭދޫގެ އިތުރުން ފޭދޫން ކަރަންޓް ކެނޑޭ މައްސަލަ ރޯދައިގެ ކުރިން ހައްލު ކުރަން ފެނަކަ އިން އިންޖީނުތަކެއް ގެނެސް ބޭނުން ކުރަން ފެށި ނަމަވެސް، ލޯޑު ބޮޑުވުމުގެ މައްސަލަ އަށް ހައްލެއް ލިބިފައެއް ނުވެ އެވެ.
ނަމަވެސް އެންމެ ފަހުން ގެނެސް މިހާރު ބޭނުންކުރަން ފަށާފައިވާ 1.8 މެގަވޮޓްގެ އިންޖީނާ އެކު އެ މައްސަލަ ވަރަށް ބޮޑު ހައްލެއް އަންނާނެ ކަމަށް ފެނަކަ އިން ބުނެ އެވެ.