ކެލާ ފަޅުގައި ރިސޯޓް ހަދަން ބީލަމަށް

ހއ. ކެލާ ފަޅުގައި ދެ ރިސޯޓެއް ތަރައްގީކޮށް ހިންގާނެ ބަޔަކު ހޯދަން ބީލަމަށް ހުޅުވާލައިފި އެވެ.

ޓޫރިޒަމް މިނިސްޓްރީން ބުނީ އެކަމަށް ޝައުގުވެރިވާ ފަރާތްތަކަށް ބީލަން ހުށަހެޅުމުގެ ފުރުސަތު މި އަހަރުގެ ޖޫން މަހުގެ 5 އާ ހަމައަށް ހުޅުވާލާފައިވާ ކަމަށެވެ. މިކަމާ ގުޅޭ ގޮތުން ބާއްވާ މައުލޫމާތު ދިނުމުގެ ސެޝަނެއް މި މަހުގެ 15 ވަނަ ދުވަހުގެ ހެނދުނު 10:00 އާއި މެއި މަހުގެ 6 ވަނަ ދުވަހުގެ މެންދުރު ފަހު 1:00 ގައި ޒޫމް މެދުވެރިކޮށް އޮންނާނެ އެވެ.

އެ ސެޝަންތަކުގައި ބައިވެރިވާން މި މަހުގެ 14 ވަނަ ދުވަހާއި އަންނަ މަހުހެ 5 ވަނަ ދުވަހުގެ 12:00 ގެ ކުރިން ޓޫރިޒަމް މިނިސްޓްރީގެ އީމެއިލް planning@tourism.gov.mv އަށް ނަމާއި، އީމެއިލް އެޑްރެސް، އަދި ފޯން ނަންބަރު މެެއިލް ކުރަން ޖެހެ އެވެ.

ކެލާ ފަޅުން ބައެއް ހިއްކައިގެން ދެ ރިސޯޓް ތަރައްގީ ކުރުމަކީ ރައީސް ޑރ. މުއިއްޒުގެ ވައުދެކެވެ. އެކަމަށް ހާއްސަކޮށްގެން އެ ރަށުގެ ފަޅުން މިހާރު ވަނީ ރިސޯޓް ތަރައްގީ ކުރަން 325.5 ހެކްޓަރު ވެސް ކަނޑައަޅައިފަ އެވެ.

އެގޮތުން ތަރައްގީ ކުރަން ހަމަޖެހިފައިވާ ދެ ރިސޯޓްގެ ތެރެއިން އެއް ރަށަކަށް 156.2 ހެކްޓަރު ހިއްކަން ހަމަޖެހިފައިވާ އިރު، އަނެއް ރަށަށް 169.3 ހެކްޓަރު ހިއްކާނެ އެވެ.