އެއްބަނޑު އެއްބަފާ ދެބޭންގެ ދެމެދުގައ ރޭ ހިނގި ޒުވާބެއްގެ ތެރޭގައި މާރާމާރީ ހިންގައި ވަޅިއަކުން ހަމަލާދީ އެކަކު ޒަހަމްކޮށްލައިފި އެވެ.
ރ. މަޑުއްވަރީގައި ރޭ 10:30 އެހާކަށްހާ އިރު ހިނގި އެ ހާދިސާގައި ޒަހަމްކޮށްލާފައި ވަނީ އެ ރަށު ބީޗްހައުސް މުހައްމަދު މުއީނެވެ. ކޮއްކޮ އޭނަ އަށް ދިން ހަމަލާގައި ބޮލުގެ ދެ ތަނެއް ޒަހަމްވެފައިވެ އެވެ. މުއީނަށް މަޑުއްވަރީ ސިއްހީ މަރުކަޒުން ފަރުވާ ދިނުމަށް ފަހު މެންދަމު 3:20 ހާއިރު ވަނީ އުނގޫފާރު ހޮސްޕިޓަލަށް ގެންގޮސްފަ އެވެ.
މުއީނަށް ހަމަލާ ދިން އޭނަގެ ކޮއްކޮ އިސްމާއީލް އާސިފަކީ މީގެ ކުރިން ވަޅިއަކުން މީހަކަށް ހަމަލާ ދިން މައްސަލައެއްގައި 10 އަހަރުގެ ޖަލު ހުކުމެއްގައި ހުއްޓައި، ދޫކޮށްލާފައިވާ މީހެކެވެ.
އެގޮތުން ނޮވެމްބަރު 22، 2019 ގައި ލަނޑާ ނަގަން އުޅުމުގެ ތެރޭގައި މަޑުއްވަރީ، ފެހިއަލި، އިސްމާއިލް ހައްމާދުއާ ދެމެދު އުފެދުނު ދެބަސްވުމެއްގައި އޭނަ އަށް އާސިފު ދޯންޏެއްގެ ތެރޭގައި ވަޅިން ހަމަލާދީ މޫދަށް އެއްލައިލި މައްސަލާގައި 10 އަހަރަށް ޖަލަށް ލާން ހުކުމްކުރީ ސެޕްޓެމްބަރު 2022 ގަ އެވެ.
މަޑުއްވަރީގައި ދެބޭންގެ މެދުގައި މާރާމާރީ ހިންގައި އެކަކު ޒަހަމްކޮށްލި އިރު، 2023 ވަނަ އަހަރު އައްޑޫ މަރަދޫފޭދޫގައި ވެސް މިފަދަ ހާދިސާ ހިނގާފައިވެ އެވެ. އެގޮތުން ކޮއްކޮ ތޫނު އެއްޗަކުން ކޮއްކި ބޭބެ އަށް ހަމަލާގައި މަރުވެފައިވެ އެވެ.
އެ މައްސަލައާ ގުޅިގެން ކުށް ސާބިތުވެ، އޭނަ އަންނަނީ މިހާރު ޖަލު ހުކުމެއް ތަންފީޒު ކުރަމުންނެވެ.