މިއީ އެންމެ ދިގު ދޫ އޮތް އަންހެން މީހާގެ ވާހަކަ އެވެ. އޭނަގެ ދުލުގައި 9.75 ސެންޓިމީޓަރު ނުވަތަ 3.8 އިިންޗި ހުރެ އެވެ. މި ވަރުގެ ދުލަކާ އެކު ޝެނެލް ޓެޕާގެ ނަން ދުނިޔޭގެ ރެކޯޑް ފޮތުގައި މިހާރު އޮތީ އެންމެ ދިގު ދޫ އޮތް އަންހެނާގެ ގޮތުގަ އެވެ.
މި ރެކޯޑް އޭނަ އަށް ލިބުނީ 2010 ގަ އެވެ. އޭގެ ފަހުން އަންނަނީ ރެކޯޑް ދަމަހައްޓަމުންނެވެ.
އެމެރިކާގެ ކެލިފޯނިއާ އަށް އުފަން ޝެނެލް، 34، ބުނި ގޮތުގައި އާދަޔާހިލާފު ބޮޑު ދުލެއް ލިބިފައިވުމަކީ އޭނަ އުފާވާ ކަމެކެވެ. އަދި އެންމެ ކުރާ ހިތްވާ ކަމަކީ އެ ދޫ ނެރެގެން އާންމުން ބިރު ގެންނެވުން ކަމަށެވެ.
"އަހަންނަށް ވަރަށް މަޖާ ކަމަކަށްވޭ ކުއްލިއަކަށް މިހާ ބޮޑު ދުކެއް ފެނިގެން މީހުން ބިރުން ހަޅޭއްލަވައިގަތީމަ،" ޝެނެލް ބުންޏެވެ. "އެހެންވެ މީހުން ސިއްސުވާލަން އާންމުކުރާ ކަމަކީ ހަމަ ކުއްލިއަކަށް އެހެން ހުރެލާފައި ދޫ ނެރެލުން."
އޭނަ ބުނި ގޮތުގައި ބޮޑު ދުލެއް އޮންނާތީ އެ ދުލުގެ ބޭނުން ތަފާތު ގޮތްގޮތަށް ހިފުމަކީ ވެސް ވަރަށް ކުރާ ހިތްވާ ކަމެކެވެ. އެގޮތުން އެކި ކަހަލަ ކަންކަމުގައި އަތުގެ ބަދަލުގައި އެ ބޮޑު ދޫ ބޭނުން ކުރާ ކަމަށް ޝެނެލް ބުންޏެވެ.
"އަހަރެންގެ އަތުގައި ރެކޯޑެއް އޮތީމަ އެންމެ އުފާވާ ކަމަކީ ވަރަށް ގިނަ ގައުމުތަކަށް ދަތުރު ކުރަން ފުރުސަތު ލިބި، އެތައް ތަނެއް ދެކިލައި، އެތައް ބަޔަކާ ދިމާވުމުގެ ފުރުސަތު ލިބުމެވެ.