އައްޑޫގައި ކަރަންޓް އެންމެ ގިނައިން ބޭނުން ކުރާ ވަގުތުތަކުގައި ލޯޑް 11.6 މެގަވޮޓަށް އަރާ ކަމަށް ފެނަކަ އިން ބުނެފި އެވެ.
އައްޑޫގެ ގުޅިފައިވާ ހަތަރު އަވަކަށް ކަރަންޓް ދޭ މަރުކަޒީ އިންޖީނުގޭގެ އިންޖީނުތަކަށް މައްސަލަ ޖެހި ކަރަންޓް ކެނޑޭ މައްސަލަ ބޮޑުވެގެން އެންމެ ފަހުން ގެނައި 1.8 މެގަވޮޓްގެ އިންޖީނު މިހާރު އިންސްޓޯލްކޮށް ނިންމައި، ޓެސްޓްކޮށް އިއްޔެ އިން ފެށިގެން ބޭނުން ކުރަމުން އަންނަ ކަމަށް ވެސް ފެނަކަ އިން ބުންޏެވެ.
އެ ކުންފުނިން ބުނި ގޮތުގައި މަރުކަޒީ އިންޖީނުގޭގައި މިހާރު 19 އިންޖީނު އިރު، އޭގެ ތެރޭގައި ހަލާކުވެފައި ދެ އިންޖީނެއް އަދިވެސް އެބަހުއްޓެވެ. އޯވަހޯލް ނުކުރާތާ ގިނަ ދުވަސްތަކެއްވެގެން މައްސަލަތައް ޖެހުނު އެެ އިންޖީނުތައް މަރާމާތު ކުރުމުގެ މަސައްކަތް ކުރިއަށްދާ ކަމަށް ފެނަކަ އިން ބުންޏެވެ.
އައްޑޫގެ ކަރަންޓަށް ދިމާވެފައިވާ އެންމެ ބޮޑު މައްސަލަ އަކީ ކުރިން އިންޖީނުތައް މަރާމާތު ނުކުރެވި ގިނަ ދުވަސްތަކެއް، މައްސަލަތައް ޖެހުން އާންމުވުމާއި މިހާރުގެ ކެޕޭސިޓީއާ އެއްވަރަށް ކަރަންޓް ނުއުފއްދޭ މައްސަލަ އެވެ.
އެގޮތުން ހިތަދު އާއި މަރަދު އާއި މަރަދޫފޭދޫގެ އިތުރުން ފޭދޫން ކަރަންޓް ކެނޑޭ މައްސަލަ ބޮޑުވެ، ފާއިތުވި ދެ މަހުގެ ތެރޭގައި އައްޑު އަށް ފެނަކަ އިން ތިން ޖެނެރޭޓަރު ގެނެސް ބޭނުން ކުރަން ފަށާފައިވެ އެވެ. ފާއިތުވި ރޯދަ މަހު ކަރަންޓް ކަނޑަން ޖެހި، ރައްޔިތުންނަށް ބޮޑު ތަކުލީފެއް ވެސް އުފުލަން ޖެހުނެވެ.